لاہور: (دنیا نیوز) گورنر پنجاب سردار سلیم حیدر خان نے کہا کہ ہم نے پنجاب کو فوکس کرنا ہے اور پیپلز پارٹی کو بحال کرنا ہے۔
میڈیا سے گفتگو کرتے ہوئے گورنر پنجاب سردار سلیم حیدر خان نے کہا کہ صدر پاکستان لاہور آئے، انہوں نے مختلف میٹنگز کیں، صدر پاکستان نے لاہور گورنر ہاؤس میں پیپلزپارٹی کے سینئر رہنماؤں سے ملاقات کی، پارلیمانی پارٹی پنجاب سے بھی ملاقات کی گئی۔
انہوں نے کہا کہ صدر پاکستان نے سینئر قیادت سے پنجاب میں سیاسی معاملات کو آگے بڑھانے کے حوالے سے مشاورت کی، اب لگاتار صدر پاکستان اور بلاول بھٹو زرداری لاہور میں آتے رہیں گے۔
سردار سلیم حیدر نے کہا کہ صدر آصف علی زرداری نے سخت ہدایات جاری کی ہیں کہ پوری پارٹی بلدیاتی انتخابات کی تیاری کرے، پی پی پی کے ٹکٹ ہولڈرز، سینئر رہنماؤں اور جنوبی اور وسطی پنجاب کے عہدیداران نے بھرپور طریقے سے بلدیاتی انتخابات پر اپنی ورکنگ شروع کر دی ہے۔
گورنر پنجاب نے کہا کہ پیپلز پارٹی بلدیاتی الیکشن کیلئے بھرپور تیاری کرے گی اور اچھا رزلٹ دے گی، ہم اتحادی حکومت کا حصہ ہیں، سب کو پتہ ہے کہ ہم ن لیگ کی محبت میں نہیں بیٹھے، ہماری مجبوری ہے۔
انہوں نے کہا کہ ہماری مجبوری ملک کے سیاسی سسٹم کو بہتر کرنا ہے تاکہ مشکل صورتحال سے نکلیں، ملک کیلئے صرف اتحادی حکومت کو سپورٹ کر رہے ہیں، اتحادی جماعت کو اپنے ساتھی کا سوچنا چاہئے۔
سردار سلیم حیدر خان نے کہا کہ پیپلز پارٹی تو سیدھی سادی جماعت ہے جس کے ساتھ بیٹھتی ہے دکھ میں سکھ میں ساتھ ہوتی ہے لیکن ن لیگ اور مختلف سیاسی جماعتیں سیاست کو زیادہ اہمیت دیتی ہیں، توقع کرتے ہیں کہ پنجاب میں مسلم لیگ ن کے ساتھ معاملات بہتر ہوجائیں گے۔
گورنر پنجاب نے کہا کہ پارلیمانی پارٹی سے ملاقات میں تمام ایم پی ایز کے حلقوں اور اضلاع کے حوالے سے گلے شکوے صدر آصف علی زرداری کو بتائے گئے، صدر مملکت نے کہا ہے بجٹ تک صبر کریں، تب تک معاملات بہتر ہو جائیں گے، خدانخواستہ نہ ہوئے تو اس وقت بیٹھ کر فیصلہ کریں گے کیا کرنا ہے۔
