اسلام آباد: (دنیا نیوز) اسلام آباد ہائیکورٹ نے پیکا قانون کے خلاف درخواست پر اٹارنی جنرل آف پاکستان کو معاونت کیلئے طلب کر لیا۔
اسلام آباد ہائیکورٹ کے جسٹس انعام امین منہاس نے پوٹھوہار یونین آف جرنلسٹس کی پیکا قانون ترمیم 2025 کے خلاف درخواست پر سماعت کی۔
درخواست گزار وکیل عادل عزیز قاضی عدالت پیش ہوئے، دورانِ سماعت اسلام آباد ہائیکورٹ کے جسٹس انعام امین منہاس نے ریمارکس دیئے کہ اس طرح کی اور درخواستیں بھی ہیں، اس پر بھی وہی آرڈر کر دیتے ہیں۔
بعدازاں عدالت نے اٹارنی جنرل آف پاکستان کو معاونت کیلئے طلب کرتے ہوئے سماعت ملتوی کردی۔
واضح رہے کہ پی ایف یو جے، اسلام آبادہائیکورٹ جرنلسٹس ایسوسی ایشن اور دیگر درخواستیں بھی اسی سلسلے میں زیر سماعت ہیں، عدالت نے تینوں درخواستیں 17 اپریل کو سماعت کیلئے مقرر کر رکھی ہیں۔
