لاہور: (دنیا نیوز) پنجاب اسمبلی اجلاس میں لوکل گورنمنٹ کے حوالے سے پنجاب حکومت کا نیا فارمولہ سامنے آگیا۔
پنجاب حکومت نے لینڈ مافیا کے گرد شکنجہ کس لیا، پنجاب اسمبلی میں پیش کئے جانے والے دی پنجاب لوکل گورنمنٹ (ترمیمی) ایکٹ 2024 کی تفصیلات سامنے آ گئیں۔
دیہاتوں میں بنی ہاؤسنگ سکیمیں بھی ٹیکس نیٹ میں شامل ہوں گی، لینڈ مافیا دیہاتوں میں سکیمیں بنا کر ٹیکس نیٹ سے بچا کرتے تھے، ٹیکس "شہری غیر منقولہ جائیداد ٹیکس ایکٹ 1958" کے تحت لگایا جائے گا۔
بل کا بنیادی مقصد پنجاب فنانس ایکٹ 2024 کے ساتھ ہم آہنگی پیدا کرنا ہے، ٹیکس کے اطلاق کا دائرہ کار شہری علاقوں میں بھی وسیع کیا جائے گا، شہری علاقوں کی حدود میں تمام تر غیر منقولہ جائیدادیں ٹیکس نیٹ کا حصہ ہوں گی۔
جائیداد کی مالیت اور دیگر معیارات کے مطابق ٹیکس کی تشخیص کی جائے گی، ٹیکس وصولی پنجاب حکومت کا مقرر کردہ ادارہ کرے گا۔
ٹیکس سے اکٹھے ہونے والے پیسے لوکل گورنمنٹ کو منتقل کیے جائیں گے، لوکل گورنمنٹ اپنے علاقوں کی ترقی اور بہتری کے لیے ٹیکس استعمال کر سکیں گے۔
