لاہور: (دنیا نیوز) وفاقی وزیر ریلوے حنیف عباسی نے کہا ہے کہ دشمن پاکستان کا دفاعی نظام مفلوج کرنا چاہتے ہیں۔
وفاقی وزیر ریلوے حنیف عباسی نے لاہور میں میڈیا سے گفتگو کرتے ہوئے کہا ہے کہ ریلوے کی بہتری کیلئے اقدامات کر رہے ہیں، ریلوے پولیس میں آپ کو واضح بہتری نظر آئے گی۔
حنیف عباسی نے کہا کہ جعفر ایکسپریس کا واقعہ افسوسناک ہے، ہمیں سوچنا ہوگا کہ دوبارہ دہشت گردی نے کیوں سر اٹھایا، ہم میزائل بناتے ہیں تو اسرائیل پروپیگنڈا کرتا ہے، دہشتگردی کیلئے ہمسایہ ملک اب افغانستان کی سرزمین کو استعمال کر رہا ہے۔
"جعفر ایکسپریس کے ہر شہید کے خاندان کو 52 لاکھ کی مالی امداد دی جائے گی"
انہوں نے کہا کہ پوری دنیا کی آنکھوں میں سی پیک کھٹک رہا ہے، دہشت گردی پاکستان میں پنپ رہی ہے، فیصلہ ہوا ہے کہ جتنے دہشت گرد پاکستان میں ہیں نہیں چھوڑا جائے گا، دہشتگردوں کیخلاف سخت کارروائی کا فیصلہ کر لیا، پی ٹی آئی نے بھارتی پروپیگنڈہ کو آگے بڑھایا۔
حنیف عباسی نے کہا کہ کامیاب آپریشن پر فوج کو خراج تحسین پیش کرتے ہیں، ریلوے پولیس کا سکیل پنجاب پولیس کے برابر کردیا ہے، جعفر ایکسپریس کے ہر شہید کے خاندان کو 52 لاکھ روپے کی مالی امداد دی جائے گی، ریلوے کی سکیورٹی بہتر کرنے کیلئے اقدامات شروع کر دیئے ہیں۔
