راولپنڈی: (دنیا نیوز) چیئرمین پی ٹی آئی بیرسٹر گوہر علی نے کہا کہ بانی پی ٹی آئی نے سانحہ جعفر ایکسپریس کی شدید مذمت کی ہے، بانی نے کہا دہشت گردی کو ایک آواز کے ساتھ دبانے کی ضرورت ہے۔
بانی پی ٹی آئی سے ملاقات کے بعد چیئرمین پی ٹی آئی بیرسٹر گوہر علی خان اور سلمان اکرم راجہ نے اڈیالہ جیل کے باہر میڈیا سے گفتگو کی۔
بیرسٹر گوہر نے کہا کہ 6 وکلا کی بانی سے ملاقات ہوئی ہے، جعفر ایکسپریس سانحہ کے بعد پہلی ملاقات ہوئی ہے، بانی نے کہا تحریک انصاف مقبول ترین جماعت ہے، اگر حکومت دہشت گردی کے خلاف سنجیدہ ہوتی تو مجھے باہر لاتے۔
چیئرمین پی ٹی آئی نے کہا کہ بانی کی 6 ماہ میں صرف دو مرتبہ بیٹوں سے فون پر بات کرائی گئی، بانی نے سیاسی کمیٹی کے آج کے فیصلے کی تائید کی ہے۔
سلمان اکرم راجہ نے کہا کہ بانی نے کہا آئین و جمہوریت کے لیے کھڑا رہوں گا، ہمارے لیڈر کے بغیر قومی سلامتی کمیٹی کی بریفنگ بے معنی ہے، بانی پی ٹی آئی نے ملک کے موجودہ حالات پر دکھ کا اظہار کیا ہے۔
وکیل بانی پی ٹی آئی کے مطابق عمران خان نے کہا کہ فارم 47 کی حکومت جتنا مرضی ظلم کرے، ڈیل نہیں کروں گا، بانی نے کہا تحریک انصاف چاروں صوبوں کی جماعت ہے، بانی کو مائنس کر کے یہ فیصلے نہیں ہو سکتے۔
سلمان اکرم راجہ نے کہا کہ ہمارے پاس کوئی گیدڑسنگی نہیں، رولزکےمطابق وکلا بانی سے ملاقات کرتے ہیں، پانچ ماہ سے سیاسی رفقا کی ملاقات نہیں ہونے دی جا رہی، اس حوالے سے ہم عدالت جائیں گے۔
