لاہور: ( دنیا نیوز) وزیر اطلاعات پنجاب عظمیٰ بخاری نے کہا ہے کہ میرا مشن صرف تھیٹر سے فحاشی اور بیہودگی کا خاتمہ کرنا ہے، کسی کی دھمکیوں کی پرواہ ہے نہ کسی سے بلیک میل ہوں گی۔
اپنے ایک بیان میں صوبائی وزیر عظمیٰ بخاری کا کہنا تھا کہ تھیٹرز کا ماحول ایسا ہونا چاہیے جہاں فیملیز ڈرامے دیکھنے آئیں، تھیٹر مالکان اور فنکار کو سدھرنے کیلئے ایک سال دیا تھا۔
انہوں نے کہا کہ تمام تھیٹر مالکان اور فنکاروں نے تھیٹر کو فیملی تھیٹر بنانے کی گارنٹی دی تھی، اسکے باوجود جن لوگوں نے ایس او پیز کی خلاف ورزی کی ان کے خلاف کارروائی ہو رہی ہے۔
صوبائی وزیر اطلاعات نے کہا کہ تھیٹر سے بے حیائی کے خاتمے کے معاملے میں کسی کی سفارش قابل قبول نہیں، اس حوالے سے آئندہ چند روز میں تھیٹر کی نئی پالیسی بن جائے گی۔
عظمیٰ بخاری کا کہنا تھا کہ عوام بھی تھیٹر سے بے حیائی کا خاتمہ چاہتے ہیں، تھیٹر کی بہتری کیلئے اقدامات پر عوامی مثبت ردعمل حوصلہ افزاء ہے۔
