اسلام آباد :(دنیا نیوز) وزیراعظم شہباز شریف اور اسلامی جمہوریہ ایران کے صدر کے درمیان ٹیلی فونک رابطہ ہوا ہے۔
سی ایم سیکرٹریٹ کے ذرائع کے مطابق وزیراعظم نے بندرعباس کی بندرگاہ پر دھماکے میں انسانی جانوں کے ضیاع پر تعزیت اور ہمدردی کا اظہار کیا جبکہ جاں بحق افراد کے اہل خانہ سے یکجہتی اور زخمیوں کی جلد صحت یابی کیلئے دعا بھی کی۔
اپنے پیغام میں انہوں نے کہا کہ پاکستان دکھ کی اس گھڑی میں ایران کے ساتھ کھڑا ہے اور ہر ممکن معاونت فراہم کرنے کو تیار ہے، دونوں رہنماؤں نے دوران گفتگو خطے میں حالیہ پیش رفت پر بھی تبادلہ خیال کیا اور وزیراعظم نے پہلگام واقعے کے پس منظر میں بھارت کی اشتعال انگیز کارروائیوں پر پاکستان کے مؤقف سے آگاہ کیا۔
شہباز شریف کا کہنا تھا کہ پاکستان خطے میں امن کا خواہاں ہے، اگر ایران خطے میں قیام امن کیلئے کوئی تعمیری کردار ادا کرنا چاہے تو پاکستان اس کا خیرمقدم کرے گا، پاکستان ہر طرح کی دہشت گردی کی شدید مذمت کرتا ہے، پاکستان خود دہشت گردی کا سب سے بڑا شکار رہا ہے۔
وزیراعظم نے غیر جانبدارانہ اور شفاف تحقیقات کیلئے پاکستان کی آمادگی کا بھی اظہار کیا اور پانی کو بطور ہتھیار استعمال کرنے کے بھارتی فیصلے کو ناقابلِ قبول قرار دیا۔
انہوں نے کہا کہ پاکستان اپنے آبی حقوق کا ہر قیمت پر دفاع کرے گا، پاکستان کشمیری عوام کی جائز جدوجہد حقِ خودارادیت کی حمایت جاری رکھے گا، پاکستان کشمیریوں کے ساتھ ہر سطح پر یکجہتی کا مظاہرہ کرتا رہے گا۔
آخر میں صدر مسعود پیزشکیان نے سانحہ بندرعباس پر اظہار یکجہتی پرشہبازشریف کا شکریہ ادا کیا، ایرانی صدر نے خطے میں قیامِ امن کیلئے پاکستان کی کوششوں کو سراہا اور وزیراعظم کو دورہ تہران کی دعوت دی جبکہ شہباز شریف نے صدر کو دورہ پاکستان کی دعوت کا اعادہ کیا۔
