سیالکوٹ: (دنیا نیوز) سابق وفاقی وزیر ڈاکٹر فردوس عاشق اعوان نے کہا ہے کہ فالز فلیگ آپریشن کا پراپیگنڈا ناکام ہوچکا ہے، بھارتی فوج کے اعلیٰ آفیسر اپنی غلطی اور ناکامی کا اعتراف کر چکے ہیں۔
میڈیا سے گفتگو کرتے ہوئے سابق وفاقی وزیر ڈاکٹر فردوس عاشق نے کہا کہ اس قوم کے بہادر سپوتوں نے دشمن کو شکست سے دوچار کیا، سرحدوں پر بسنے والوں کی نمائندہ بن کر پیغام دیتی ہوں کہ مودی ہم انتہا پسند سوچ کے سامنے چٹان بن کر کھڑے ہیں۔
انہوں نے کہا کہ مودی کے ناپاک عزائم کے آگے پوری قوم سیسہ پلائی دیوار بن کر کھڑی ہو گی، سیالکوٹ شہر دشمن کے ناپاک ارادوں کو خاک میں ملانے کے لئے پہلی دیوار ثابت ہو گا، پاکستان نے 70 ہزار جانوں کا نذرانہ دے کر اس ملک میں امن قائم کیا ہے۔
فردوس عاشق نے کہا کہ ہم دہشت گردی کے خلاف ہیں اور اس کی مذمت کرتے ہیں، پاکستان ہمیشہ دہشت گردی کے مخالف رہا ہے، ہمارے دشمن نے ہمیشہ دہشت گردی کو سپورٹ کیا ہے، بلوچستان میں جعفر ایکسپریس پر دہشت گردی کے پیچھے بھارت کی سوچ شامل ہے، بھارتی میڈیا نے اس واقعہ پر بغلیں بجائی تھیں۔
انہوں نے کہا کہ ہمارے ریاستی اداروں اور حکومت نے بین الاقوامی سطح پر بھارت میں ہونیوالی دہشت گردی کی شفاف تحقیقات کی پیشکش کی، مقبوضہ کشمیر میں بھارت نے معصوم اور نہتے شہریوں کو محکوم بنایا ہوا ہے، بھارت اپنے پھیلے ہوئے گند کو دیکھنے کی بجائے الزامات پاکستان پر لگانے پر اتر آتا ہے۔
فردوس عاشق نے کہا کہ پہلگام بھارت کا ایک ڈرامہ ہے جو دنیا کے سامنے آشکار ہو چکا ہے، مودی اس واقعہ کی آڑ میں پاکستان کے خلاف اپنے مزموم ارادے پورے کرنا چاہتا ہے، سندھ طاس معاہدے کی یکطرفہ معطلی کے خلاف اقوام متحدہ کو نوٹس لینا چاہئے۔
انہوں نے کہاکہ ہیومن رائٹس کی تنظیموں کے عہدیدار ایسے واقعات پر تقریریں کرتے ہیں لیکن مودی کے ان اقدامات پر خاموشی کیوں ہے؟، مودی سرکار کو ہوش کے ناخن لینے چاہئیں، مودی پاکستان کا پانی بند کرنے کے ایک فلمی ڈائیلاگ کی مارکیٹنگ کر رہا ہے، پاکستانی زرعی اجناس پوری دنیا کو ایکسپورٹ کرتا ہے۔
