اسلام آباد:(دنیا نیوز) ملائیشیا نے مودی کے جھوٹے بیانیے کو مسترد کردیا۔
پہلگام فالز فلیگ آپریشن کے بعد پوری دنیا پر مودی کی اصلیت عیاں ہو گئی، مودی سرکار نے پہلگام جعلی حملے کا ڈرامہ رچا کر بین الاقوامی سطح پر اپنی ساکھ کو مزید کمزور کر دیا، چین کے بعد ملائیشیا نے بھی پہلگام حملے پر شفاف تحقیقات کا مطالبہ کردیا۔
ذرائع کے مطابق ملائیشیا نے بھی بھارت کا جھوٹا بیانیہ مسترد کر دیا، ملائیشیا نے جرأت مندانہ مؤقف اختیار کرتے ہوئے مقبوضہ کشمیر کو ’ انڈین ایڈمنسٹرڈ کشمیر‘ قرار دیا، جس پر بھارت غیر جانبدار مؤقف پر سیخ پا ہوگیا اور گودی میڈیا کا شدید ردِعمل سامنے آیا۔
ذرائع نے بتایا کہ ملائیشیا کا کشمیر کو "انڈین ایڈمنسٹرڈ کشمیر" کہنے پر بھارتی چینل نیوز 18 نے خوب واویلا کیا، بھارتی میڈیا ملائیشیا کو پاکستان کی حمایت کا نام دے کر اپنی خفت مٹا رہا ہے۔
دوسری جانب سیاسی ماہرین کا کہنا تھا کہ ملائیشیا کی حمایت سے پاکستان کا مؤقف عالمی سطح پر مضبوط ہو گیا، چین، ملائیشیا اور دیگر ممالک کی پاکستان کی حمایت پر بھارت مزید تنہا ہو گیا ہے، بین الاقوامی سطح پر پاکستان کی حمایت سے مودی کا جھوٹا بیانیہ زمین بوس ہو گیا۔
سیاسی ماہرین نے مزید کہا کہ ملائیشیا کے بیان سے بھارت کا پاکستان کا نام بدنام کرنے کا عالمی پروپیگنڈا ایک بار پھر ناکام ہوگیا، بین الاقوامی سطح پر پاکستان کے موقف کی بڑھتی حمایت نے مودی کے بیانیے کو مزید کمزور کر دیا۔
