مظفر آباد: (دنیا نیوز) پاکستان آرمی کی جانب سے لائن آف کنٹرول پر دشمن کو بھاری نقصان پہنچانے کا سلسلہ جاری ہے، بھارتی فوج نے لائن آف کنٹرول کے چورا کمپلیکس سمیت متعدد چیک پوسٹ پر سفید جھنڈا لہرا دیا۔
سکیورٹی ذرائع کے مطابق پاک فوج کے جوابی وار پر بھارت نے ہاتھ کھڑے کر دیئے، پاکستان آرمی کی جانب سے لائن آف کنٹرول پر دشمن کی پوسٹوں کو بھاری نقصان پہنچایا گیا تھا۔
بھارتی فوج نے چورا کمپلیکس پوسٹ ،چکوٹھی سیکٹر اور وادی لیپہ سیکٹر کی پوسٹ وانجل فارورڈ میں سفید جھنڈا لہرا کر اپنی شکست کو تسلیم کر لیا۔
اس کے علاوہ بھارتی فوج نے سانگھڑ پوسٹ بلمقابل چری کوٹ سیکٹر پر بھی سفید جھنڈا لہرا دیا ہے۔
سکیورٹی ذرائع کا کہنا ہے کہ جنگ کے دوران سفید جھنڈا لہرانے کا واضح مطلب شکست تسلیم کرنا ہے، پاک فوج بھارتی فوج کی بزدلانہ کارروائیوں کا موثر جواب دے رہی ہے، جس کے نتیجے میں بھارتی فوج بوکھلاہٹ اور خوف میں مبتلا ہو چکی ہے، پاکستان کی جانب سے کی جانے والی جوابی کارروائیوں نے دشمن کو شدید نقصان پہنچایا ہے۔
واضح رہے کہ بھارت نے رات گئے بزدلانہ حملے کئے تھے جس کے جواب میں پاک فوج نے بھرپور جواب دیتے ہوئے ان کی متعدد چیک پوسٹوں کو تباہ اور 5 بھارتی طیارے تباہ کر دیئے تھے۔
دوسری جانب وزیر دفاع خواجہ آصف کا کہنا ہے کہ بھارت کو جارحیت مہنگی پڑ گئی، پاکستان نے بھارتی جارحیت کے جواب میں کارروائی میں برتری حاصل کرلی، دشمن نے بہت مار کھا لی، بھارتی فوجی پوسٹیں چھوڑ کر بھاگ گئے، اب ہم حالت جنگ میں ہیں اور یہ جنگ بھارت نے مسلط کی ہے۔
وفاقی وزیر اطلاعات عطاء اللہ تارڑ نے کہا ہے کہ بھارت سفید جھنڈا لہرانے پر مجبور ہوگیا، بھارت کیلئے شرم کا مقام ہے۔
ان کا کہنا تھا کہ بھارتی میڈیا تسلیم کر رہا ہے پاکستان نے 5 جہاز مار گرائے ہیں، رات کے اندھیرے میں حملہ کرنا بزدلی کی نشانی ہے، پاکستانی قوم اور افواج پاکستان کا مورال بلند ہے۔
