اسلام آباد: (دنیا نیوز) بھارت ہزیمت پر ہزیمت اٹھانے لگا، بھارت نے 6 اور 7 مئی کی رات کو پاکستان پر بزدلانہ حملہ کیا جس پر پاکستان نے فوری اور بھرپور جواب دیتے ہوئے دشمن کے 5 جدید جنگی طیارے، ڈرونز اور متعدد پوسٹیں تباہ کر دیں۔
سکیورٹی ذرائع نے کہا ہے کہ پاکستان کے بھرپور جواب سے بھارت گھبراہٹ اور بوکھلاہٹ کا شکار ہے، پاکستان کے بھرپور جواب سے بھارتی فضائیہ خوف میں مبتلا اور شدید کنفیوژن کا شکار ہے۔
مصدقہ ذرائع کے مطابق پاک فضائیہ کی مؤثر کارروائی کے بعد بھارتی فضائیہ دوبارہ ہوائی حملے سے کترا رہی ہے، بھارتی فضائیہ کی ہچکچاہٹ کے بعد 7 اور 8 مئی کی رات سے بھارت اسرائیلی ساخت کے ہیراپ ڈرونز کو پاکستان بھیج کر ایک اور بزدلانہ کارروائی کر رہا ہے۔
سکیورٹی ذرائع نے مزید کہا ہے کہ مستعد افواج پاکستان نے اب تک 25 بھارتی ہیراپ ڈرونز مار گرائے ہیں، بھارت اپنے مایوس عوام اور 6، 7 مئی کی ہزیمت چھپانے کے لئے پاکستان کو مزید اشتعال دلانے کی کوشش کر رہا ہے، افواج پاکستان بھارت کی ہر طرح کی ننگی جارحیت کا منہ توڑ جواب دے رہی ہیں اور دیتی رہیں گی۔
