نئی دہلی: (دنیا نیوز) پاکستان کی جوابی کارروائی پر بھارتی فوج نے بڑے پیمانے پر تباہی کا اعتراف کر لیا۔
بھارتی فوج کے مطابق پاکستان نے 26 سے زائد مقامات پر حملے کئے، فوجی اڈوں پر ساز وسامان اور عملے کو نقصان پہنچا، پاکستان نے بھارتی پنجاب میں فضائی اڈے کو نشانہ بنانے کیلئے تیز رفتار میزائل کا استعمال کیا۔
دوسری جانب بھارتی وزارت دفاع اور وزارت خارجہ نے بھی اعتراف کیا ہے کہ پاکستان نے ہمارے فوجی اڈوں کو حملے کر کے نقصان پہنچایا ہے۔
واضح رہے کہ پاکستان نے بھارتی جارحیت کا منہ توڑ جواب دیتے ہوئے ادھم پور، آدم پور اور شیر کوٹ ائیر بیسر سمیت اکھنور، جموں، بھٹنڈا، سرسہ، سسرام، برنالہ، مامون سمیت کئی ائیر فیلڈ کو تباہ کیا اور فوجی چوکیوں کو بھی اڑایا ہے۔
پاکستان نے بھارتی ریاست مہاراشٹرا کی الیکٹرک کمپنی پر سائبر حملہ کر کے بجلی کا نظام مکمل طور پر جام کر دیا اور ملٹری سیٹیلائٹ کو بھی جام کر دیا، اس کے علاوہ بھارتی وزیر اعظم نریندر مودی کی ریاست گجرات میں پاکستانی ڈرونز کئی گھنٹوں تک پرواز کرتے رہے۔
پاک فضائیہ کی جانب سے بھارت کو سب سے بڑا جھٹکا بھارت کے فضائی دفاعی نظام ایس 400 کو تباہ کر کے دیا گیا، جے ایف 17 تھنڈر طیاروں نے اپنے ہائپر سونک میزائل سے سسٹم مکمل طور پر تباہ کیا۔
