اسلام آباد: (ذیشان یوسفزئی) پاکستانیوں کی یورپی ممالک میں سیاسی پناہ لینے کی درخواستوں کی شرح میں کمی آئی ہے، 2023 میں پاکستانیوں نے سب سے زیادہ سیاسی پناہ کیلئے اپلائی کیا تھا۔
پاکستانیوں کے سیاسی پناہ (اسائلم) کیلئے اپلائی کرنے کے ٹرینڈ میں 2020 سے اضافہ دیکھا گیا۔
یورپی یونین کی اسائلم رپورٹ 2022 کے مطابق پاکستان شہریوں نے اپریل 2022 تک سیاسی پناہ کی 25 ہزار درخواستیں دی تھیں جو کہ 2021 اور 2020 سے کہی زیادہ تھیں، تاہم اس ٹرینڈ میں مزید اضافہ 2023 میں ہوگیا، 2023 میں 30 ہزار 440 افراد نے عالمی حفاظت کی درخواستیں دی تھیں جس میں 2024 میں کمی واقع ہوئی۔
یورپی یونین کی رپورٹ کے مطابق اکتوبر 2023 سے اکتوبر 2024 کے درمیان 28 ہزار پاکستانیوں نے سیاسی پناہ کی درخواستیں دیں، 2023 کے دوران ماہانہ 3400 درخواستیں پاکستانیوں نے جمع کرائی تھیں تاہم اکتوبر 2024 کے دوران یہ ماہانہ شرح 1900 درخواستوں پر آئی۔
پاکستانیوں کی جانب سے اٹلی میں سب سے زیادہ درخواستیں دی جا رہی ہیں اس کے بعد فرانس، گریس اور جرمنی میں دی جا رہی ہیں۔
رپورٹ کے مطابق اکتوبر 2023 سے اکتوبر 2024 تک یورپی یونین ممالک نے صرف 20 ہزار درخواستوں پر فیصلہ دیا جس میں صرف 12 فیصد لوگوں کو ریفیوجی کا سٹیٹس دیا گیا، اکتوبر 2024 تک مختلف ممالک کے ساتھ 34 ہزار فیصلے التوا کا شکار ہیں۔
