اسلام آباد: (ویب ڈیسک) سپیکر قومی اسمبلی سردار ایاز صادق نے مستونگ میں بھارتی حمایت یافتہ دہشت گردوں کے خلاف کامیاب آپریشن پر سکیورٹی فورسز کو خراج تحسین پیش کیا۔
سپیکر قومی اسمبلی سردار ایاز صادق نے آپریشن کے دوران میجر زیاد سلیم اور سپاہی ناظم حسین کے جانی نقصان پر گہرے دکھ اور افسوس کا اظہار کرتے ہوئے خراج عقیدت پیش کیا اور کہا کہ بلوچستان میں بھارتی سرپرستی میں سرگرم بھارتی حمایت یافتہ دہشت گردوں کا انجام عبرتناک ہوگا۔
سردار ایاز صادق نے کہا کہ سکیورٹی فورسز کے بہادر جوانوں کی قربانیاں رائیگاں نہیں جائیں گی، قوم کو اپنے بہادر افسروں اور جوانوں پر فخر ہے، پاکستان کے دفاع و استحکام کے لیے جانوں کا نذرانہ دینے والے قوم کے حقیقی ہیرو ہیں۔
انہوں نے مزید کہا کہ دہشت گردوں کے خلاف سکیورٹی فورسز کی پیشہ ورانہ کارروائیاں قابل تحسین ہیں، غم اور دکھ کی گھڑی میں شہداء کے اہلخانہ کے غم میں برابر کا شریک ہوں، سپیکر قومی اسمبلی نے اللہ تعالی سے شہدا کے درجات کی بلندی اور لواحقین کو صبر جمیل عطا فرمانے کی دعا بھی کی۔
