اسلام آباد: (دنیا نیوز) ڈسٹرکٹ اینڈ سیشن کورٹس اسلام آباد میں اداروں کے خلاف متنازعہ ٹویٹس کے کیسز کی سماعت ہوئی جہاں سینیٹر اعظم سواتی پر 2 مقدمات میں فرد جرم کی کارروائی مؤخر کر دی گئی۔
ایڈیشنل ڈسٹرکٹ اینڈ سیشن جج افضل مجوکہ نے کیسز پر سماعت کی، پی ٹی آئی رہنما اعظم سواتی اپنے وکلاء مرتضیٰ طوری اور سہیل سواتی کے ہمراہ عدالت میں پیش ہوئے، بریت کی درخواست پر دلائل نہ ہوسکے۔
عدالت میں اعظم سواتی نے کہا کہ میں آج عدالت میں کچھ بتانا چاہتا ہوں، میں 2003 سے سینیٹ میں ہوں، میری ہمیشہ سے کوشش رہی کہ ہم عدلیہ کو مضبوط کریں، مجھے افسوس ہے کہ ہم آپ کے ہاتھ مضبوط نہیں کر سکے۔
عدالت نے اعظم سواتی کے وکلاء کو اگلی سماعت پر بریت کی درخواست پر دلائل دینے کی ہدایت کی اور سماعت 20 ستمبر تک ملتوی کردی۔
اعظم سواتی کے خلاف پیکا ایکٹ کے تحت 2 مقدمات درج ہیں۔
