اسلام آباد: (دنیا نیوز) الیکشن کمیشن نے نااہلی کے ریفرنس میں پاکستان تحریک انصاف (پی ٹی آئی) کے رہنما اور قومی اسمبلی میں اپوزیشن لیڈر عمر ایوب کی عدم پیشی کے باعث ریفرنس پر سماعت غیر معینہ مدت تک ملتوی کر دی۔
چیف الیکشن کمشنر کی سربراہی میں 5 رکنی بنچ نے عمر ایوب کے خلاف نا اہلی کے ریفرنس پر سماعت کی، تاہم عمر ایوب آج بھی پیش نہیں ہوئے۔
دوران سماعت جونیئر وکیل نے الیکشن کمیشن کو بتایا کہ وکیل پشاور ہائیکورٹ میں ہیں، اس لئے پیش نہیں ہوئے، اگلی تاریخ دے دی جائے، جس کے بعد چیف الیکشن کمشنر نے ریمارکس دیئے کہ انہیں اگلی تاریخ دے دیں۔
بعدازاں الیکشن کمیشن نے عمر ایوب نااہلی کیس کی سماعت غیر معینہ مدت تک ملتوی کر دی۔
یاد رہے کہ 30 مئی کو قومی اسمبلی کے سپیکر سردار ایاز صادق نے ایوان زیریں میں اپوزیشن لیڈر عمر ایوب خان کی نااہلی کا ریفرنس الیکشن کمیشن آف پاکستان کو بھجوایا تھا، یہ ریفرنس سابق ایم این اے بابر نواز کی جانب سے دائر درخواست پر مبنی ہے، جو 2024 کے عام انتخابات میں این اے 18 (ہری پور) سے عمر ایوب سے 82 ہزار ووٹوں کے فرق سے ہار گئے تھے۔
الیکشن کمیشن نے فوری طور پر ریفرنس کی پہلی سماعت 4 جون کو مقرر کر دی تھی اور عمر ایوب اور بابر نواز دونوں کو نوٹسز جاری کر دیئے گئے تھے۔
