اسلام آباد: (دنیا نیوز) الیکشن کمیشن نے اپوزیشن لیڈر قومی اسمبلی عمر ایوب کے اثاثوں سے متعلق کیس واپس لینے کی استدعا مسترد کر دی۔
چیف الیکشن کمشنر کی سربراہی میں 5 رکنی بنچ نے عمر ایوب کے اثاثوں سے متعلق کیس کی سماعت کی۔
اپوزیشن لیڈر قومی اسمبلی و پی ٹی آئی رہنما عمر ایوب کے وکیل نے دلائل دیتے ہوئے کہا کہ 31 دسمبر تک گوشواروں کی تفصیلات جمع کرانا ہوتی ہیں، قواعد کے مطابق غلط گوشوارے جمع ہونے کے 120 روز کے اندر الیکشن کمیشن رکن اسمبلی کے خلاف شکایت درج کر سکتا ہے، جبکہ الیکشن کمیشن نے رواں برس 29 اپریل کے بعد نوٹس بھیجا۔
یہ خبر بھی پڑھیں:24 اور 26 نومبر احتجاج کیسز: عمر ایوب کی ضمانت خارج، گرفتاری کا حکم
عمر ایوب کے وکیل نے اسے خلاف قواعد قرار دیتے ہوئے الیکشن کمیشن سے نوٹس واپس لینے کی استدعا کی جسے کمیشن نے مسترد کر دیا۔
رکن الیکشن کمیشن شاہ محمد نے درخواست گزار کے وکیل کو بتایا کہ کمیشن نے پہلا نوٹس مقررہ مدت کے اندر بھجوایا تھا اور الیکشن کمیشن نے عمر ایوب کو فیئر ٹرائل کا موقع دیا ہے۔
الیکشن کمیشن نے عمر ایوب کی درخواست مسترد کرتے ہوئے کیس کی مزید سماعت 29 جولائی تک ملتوی کر دی۔
