بارشوں کے ساتویں سپیل کی پیشگوئی، دریاؤں میں طغیانی بارے ایڈوائزری جاری

لاہور: (دنیا نیوز) پنجاب ڈیزاسٹر مینجمنٹ اتھارٹی (پی ڈی ایم اے) نے مون سون بارشوں کے اگلے سپیل کی پیشگوئی کرتے ہوئے فلڈ ایڈوائزری جاری کر دی۔

ترجمان پی ڈی ایم اے کے مطابق دریائے ستلج، راوی، چناب، جہلم اور ان سے ملحقہ ندی نالوں میں ممکنہ سیلاب کا خطرہ ہے، 13 اگست سے شروع ہونے والے مون سون بارشوں کے ساتویں سپیل کے باعث دریاؤں میں پانی کی سطح میں خطرناک حد تک اضافہ ظاہر کیا گیا ہے۔

وزیراعلیٰ پنجاب کی خصوصی ہدایات پر صوبے بھر کے کمشنرز، ڈپٹی کمشنرز اور تمام متعلقہ محکموں کو الرٹ جاری کر دیا گیا ہے، محکمہ لوکل گورنمنٹ، زراعت، آبپاشی، صحت، جنگلات، لائیو سٹاک اور ٹرانسپورٹ کو بھی پیشگی انتظامات مکمل کرنے کی ہدایات دی گئی ہیں۔

ڈی جی پی ڈی ایم اے عرفان علی کاٹھیا نے کہا ہے کہ تمام محکمے ایمرجنسی کی صورت میں فوری ردِعمل کیلئے تیار رہیں، ایمرجنسی کنٹرول رومز میں عملے کو 24 گھنٹے مستعد رکھا جائے اور ریسکیو 1122 کی ٹیمیں ہائی الرٹ رہیں۔

انہوں نے مزید کہا کہ دریاؤں کے کنارے آباد لوگوں کو محفوظ مقامات پر منتقل کیا جائے اور مویشیوں کے انخلا کو بھی یقینی بنایا جائے، عوام الناس سے اپیل کی گئی ہے کہ وہ جاری کردہ احتیاطی تدابیر پر سختی سے عمل کریں، دریاؤں، نہروں، ندی نالوں اور تالابوں میں نہانے سے گریز کریں اور ہنگامی انخلا کی صورت میں انتظامیہ سے مکمل تعاون کریں۔

پی ڈی ایم اے نے شہریوں کو مشورہ دیا ہے کہ وہ تازہ ترین موسمی صورتحال اور ہدایات کیلئے متعلقہ اداروں سے رابطے میں رہیں۔