لاہور: (دنیا نیوز) لاہور ہائیکورٹ نے ایئرپورٹ سے پکڑے گئے کروڑوں روپے مالیت کے 5 کلو سونے کی واپسی کے کیس میں کسٹم حکام سے سونے سے متعلق تفصیلی رپورٹ طلب کر لی۔
لاہور ہائی کورٹ کے جسٹس خالد اسحاق نے عباس علی کی درخواست پر سماعت کی۔
درخواست گزار نے موقف اپنایا کہ کسٹم انفورسمنٹ حکام نے 2006 میں لاہور ایئرپورٹ سے پانچ کلو سونا پکڑا لیکن عدالتی کارروائی کے بعد سونا واپس نہیں کیا گیا، اعلیٰ عدالت نے بھی سونا یا اس کے مساوی موجودہ وقت کے مطابق ادائیگی کا حکم دیا لیکن کسٹم حکام سونا یا مساوی رقم دینے سے گریزاں ہے۔
درخواست گزار نے استدعا کی کہ عدالت حکم کے مطابق سونا یا موجودہ وقت کے مطابق ادائیگی کرنے کا حکم دے۔
عدالت نے استفسار کیا کہ کسٹم حکام بتائے سونا کہاں ہے؟ کسٹم حکام نے بتایا کہ سونا پاکستان منٹ بھجوا کر پگھلا دیا گیا ہے، جس پر عدالت نے ریمارکس دیئے کہ سونا کیوں پگھلایا گیا اور کس قانون کے تحت ایسا کیا گیا۔
وکیل کسٹم نے عدالت کو آگاہ کیا کہ کسٹم حکام 2006 کی قیمت کے مطابق 60 لاکھ روپے ادا کرنے کیلئے تیار ہے۔
عدالت نے ریمارکس دیئے کہ کسٹم حکام اعلیٰ عدالتی حکم کے مطابق موجودہ ریٹ کے مطابق ادائیگی کی پابند ہے، جس پر وکیل کسٹم نے کہا کہ عدالت مہلت دے کسٹم حکام سے ہدایات لے کر آگاہ کر دیتے ہیں۔
بعدازاں لاہور ہائیکورٹ نے کیس کی سماعت 26 ستمبر تک ملتوی کر دی۔
