کراچی: (دنیا نیوز) وزیراعلیٰ سندھ مراد علی شاہ نے خبردار کیا ہے کہ کراچی میں بارش کے بعد کئی ’’برساتی مینڈک‘‘ نکل آئے جو افواہیں پھیلا رہے ہیں، پورا پاکستان سیلاب سے متاثر ہے، غلطیوں کی نشاندہی کریں، بلاوجہ تنقید ٹھیک نہیں۔
کراچی میں مزارِ قائد پر میڈیا سے گفتگو کرتے ہوئے وزیراعلیٰ سندھ مراد علی شاہ کا کہنا تھا کہ پاکستان قائداعظم کی جدوجہد کا نتیجہ ہے اور اب ہماری ذمہ داری ہے کہ ہم ان کے اصول ایمان، اتحاد اور قربانی کو اپنا کر ملک کو ایک حقیقی اسلامی فلاحی ریاست بنائیں۔
انہوں نے کہا کہ آج کے دن ہم اپنے عظیم قائدین شہید ذوالفقار علی بھٹو اور محترمہ بے نظیر بھٹو کو بھی یاد کرتے ہیں جنہوں نے ملک کے دفاع اور ایٹمی پروگرام کیلئے تاریخی کردار ادا کیا۔
ان کا کہنا تھا کہ بھارتی جارحیت کا بھرپور جواب افواجِ پاکستان اور پوری قوم نے اتحاد کے ساتھ دیا اور یہ اتحاد ہی ہماری اصل طاقت ہے۔
وزیراعلیٰ سندھ نے کشمیری عوام پر بھارتی مظالم اور اسرائیلی جارحیت کی شدید مذمت کی اور کہا کہ معصوم بچوں اور شہریوں پر بمباری کرنے والا اسرائیل مسلم دنیا کی یکجہتی سے ضرور ناکام ہوگا۔
ملک میں حالیہ سیلابی صورتحال پر بات کرتے ہوئے مراد علی شاہ کا کہنا تھا کہ صوبہ سندھ سمیت تمام علاقے متاثر ہوئے ہیں، ہماری اولین ترجیح انسانی جانوں کو بچانا اور بیراجوں و بندوں کو محفوظ رکھنا ہے، عوام سے اپیل ہے کہ خاص طور پر کچے کے علاقے کے لوگ حکومت کی ہدایات پر عمل کریں تاکہ جانی نقصان سے بچا جا سکے۔
انہوں نے کہا کہ چیئرمین بلاول بھٹو زرداری نے واضح ہدایت دی ہے کہ فوری ریلیف فراہم کیا جائے، زرعی اور ماحولیاتی ایمرجنسی نافذ کی جائے اور عالمی سطح پر امداد کیلئے فلیش اپیل کی جائے۔
کراچی میں اربن فلڈنگ پر تنقید کے جواب میں وزیراعلیٰ سندھ کا کہنا تھا کہ پورا پاکستان سیلاب سے متاثر ہے، غلطیوں کی نشاندہی کریں، بلاوجہ تنقید ٹھیک نہیں، بارش کے بعد بہت سے برساتی مینڈک نکل آئے ہیں جو بے بنیاد افواہیں پھیلا رہے ہیں، انہوں نے خبردار کیا کہ ایسے عناصر لسانی یا سیاسی تفریق پیدا کرنے کی کوشش نہ کریں، کیونکہ قوم پہلے ہی اس کی بھاری قیمت چکا چکی ہے۔
مراد علی شاہ نے کہا کہ انتظامیہ اور منتخب نمائندے بارش اور سیلابی صورتحال میں سڑکوں پر موجود رہے اور اپنی ذمہ داریاں ادا کرتے رہے، کوتاہیاں ضرور ہوتی ہیں، مگر ان پر کام کیا جا رہا ہے، غلط افواہیں پھیلانے کا سلسلہ بند ہونا چاہیے۔
وزیراعلیٰ سندھ کا مزید کہنا تھا کہ سیلابی صورتحال سے نمٹنے کیلئے پوری طرح تیار ہیں، ہماری پہلی ترجیح لوگوں کا تحفظ کرنا ہے۔
انہوں نے واضح کیا کہ پاکستان پیپلز پارٹی پانی سے متعلق ہر ایسے منصوبے کی حمایت کرے گی جو غیر متنازع ہو اور عوامی مسائل کے حل کیلئے عملی اقدامات کا سلسلہ جاری رکھا جائے گا۔
