اسلام آباد: (دنیا نیوز) وفاقی وزیر مصدق ملک نے کہا کہ آئندہ مون سون کی ابھی سے تیاریاں شروع کرنا ہوں گی،تمام اداروں کو مل کر بہتر مستقبل کیلئے کام کرنا ہوگا۔
وفاقی وزیر مصدق ملک اور چیئرمین این ڈی ایم اے لیفٹیننٹ جنرل انعام حیدر ملک نے سیلاب کے حوالے سے بریفنگ دی، مصدق ملک نے کہا کہ پاکستان موسمیاتی تبدیلی سے شدید متاثرہ ملکوں میں شامل ہے، وزیراعظم نے چیلنجز سے نمٹنے کیلئے موسمیاتی ایمرجنسی نافذ کرنے کا اعلان کیا۔
مصدق ملک نے کہا کہ پنجاب، خیبرپختونخوا، گلگت بلتستان اور آزاد کشمیر کے عوام کے ساتھ ہیں، سندھ میں سیلاب سے نمٹنے کیلئے پیشگی انتظامات کیے ہیں۔
وفاقی وزیر نے کہا کہ سیالکوٹ اور نارووال میں بارش سے شدید تباہی ہوئی، پنجاب، خیبر پختونخوا، گلگت بلتستان اور آزاد کشمیر کے عوام کے ساتھ ہیں۔
انہوں نے کہا کہ تمام اداروں کو مل کر بچوں کے بہتر مستقبل کیلئے کام کرنا ہوگا، سیلاب اور بارشوں کی وجہ سے 900 افراد جاں بحق ہوئے۔
موسمیاتی تبدیلی گلوبل سکیورٹی تھریٹ ہے: چیئرمین این ڈی ایم اے
چیئرمین این ڈی ایم اے لیفٹیننٹ جنرل انعام حیدر ملک نے کلائمیٹ چینج کو گلوبل سکیورٹی تھریٹ قرار دے دیا اور کہا آئندہ دو سے تین روز مون سون جاری رہے گا، ستلج، راوی اور چناب کے علاقوں میں صورتحال کنٹرول میں ہے۔
لیفٹیننٹ جنرل انعام حیدر ملک نے کہا کہ ہیڈ پنجند اور گڈو بیراج پر پانی کا بہاؤ تیز ہے، پنجاب میں 24 لاکھ اور سندھ میں ڈیڑھ لاکھ لوگوں کو محفوظ مقام پر منتقل کیا گیا۔
انہوں نے کہا کہ امدادی سرگرمیوں میں مصروف فلاحی اداروں کے مشکور ہیں، آئندہ پیشگی انتظامات کے لیے تمام ادارے کام کر رہے ہیں، سیلاب کی وجہ سے فصلوں کو شدید نقصان پہنچا ہے۔
چیئرمین این ڈی ایم اے کا کہنا تھا کہ پانی کا بہاؤ کم کرنے کے لیے کچھ علاقوں میں بند توڑے گئے، پنجاب حکومت کو راشن پیکیج سمیت 9 ہزار ٹینٹ فراہم کئے گئے ہیں، پنجاب کے لیے 9 ہزار ٹن سے زیادہ راشن فراہم کیا گیا۔
لیفٹیننٹ جنرل انعام حیدر ملک نے کہا کہ 16 سے 18 ستمبر کے دوران وسطی پنجاب اور آزاد کشمیر میں بارش کا امکان ہے، موسمیاتی چیلنجز سے نمٹنے کیلئے مل کر اقدامات کرنا ہوں گے، درجہ حرارت بڑھنے کی وجہ سے گلیشیئرز تیزی سے پگھل رہے ہیں۔
