دوحہ میں عرب اسلامی سربراہی اجلاس آج، وزیراعظم شہباز شریف قطر پہنچ گئے

اسلام آباد، دوحہ: (دنیا نیوز) قطرکےدارالحکومت دوحہ میں عرب اسلامی ممالک کا ہنگامی سربراہی اجلاس آج ہوگا جس کے لیے وزیراعظم شہباز شریف قطر پہنچ گئے ہیں۔

نائب وزیراعظم و وزیر خارجہ محمد اسحاق ڈار، وفاقی وزیر دفاع خواجہ محمد آصف، وفاقی وزیر اطلاعات و نشریات عطا اللہ تارڑ اور معاون خصوصی سید طارق فاطمی وزیراعظم کے ساتھ وفد میں شامل ہیں۔

واضح رہے کہ اسرائیل کے حملوں کے پیش نظر عرب اور اسلامی ممالک کا اجلاس پاکستان کی معاونت سے ہو رہا ہے، اس سلسلے میں وزرائے خارجہ کا اجلاس گزشتہ روز ہوا جس میں پاکستان نے اسلامی ممالک کی مشترکہ ٹاسک فورس بنانے کی تجویز دی۔

یہ خبر بھی پڑھیں: پاکستان کی اسرائیلی اقدامات روکنے کیلئے عرب اسلامی ٹاسک فورس بنانے کی تجویز

 ترجمان دفترخارجہ کےمطابق عرب اسلامی ممالک کا اجلاس اسرائیل کےفضائی حملوں اورفلسطین کی صورتحال پر طلب کیا گیا ہے، جس میں اسلامی تعاون تنظیم کے رکن ممالک کےسربراہان مملکت و حکومت اوراعلیٰ عہدیداران شرکت کریں گے۔

ترجمان کا کہنا ہے کہ اجلاس کی تیاری کے لیے عرب اسلامی ممالک کے وزرائےخارجہ کی نشست ہوئی جس میں پاکستان کی نمائندگی نائب وزیراعظم و وزیر خارجہ اسحاق ڈار نے کی،  پاکستان برادرملک قطر کےساتھ اپنے تعلقات کو انتہائی اہمیت دیتا ہے، قطر اور دیگر ریاستوں کے خلاف اسرائیلی جارحیت کی شدید مذمت کرتےہیں۔

یاد رہے کہ قطر سے یکجہتی اورحمایت کے اظہار کیلئے وزیراعظم نےگیارہ ستمبر کو دوحہ کا دورہ کیا تھا اور قطری قیادت سے ملاقات میں پاکستان کی مکمل حمایت کا اعادہ کیا۔

بعدازاں پاکستان نے دوست ممالک سے مل کر سلامتی کونسل کا ہنگامی اجلاس بھی بلوایا تھا جس میں قطر پر حملوں کی مذمت کی گئی۔