کراچی: (دنیا نیوز) پاکستان پیپلز پارٹی نے پنجاب حکومت سے صوبے میں زرعی ایمرجنسی نافذ کرنے کا مطالبہ کر دیا۔
پیپلز پارٹی نے مطالبہ کیا کہ سیلاب متاثرین کو بجلی کے بلوں سے مکمل چھوٹ دی جائے اور بین الاقوامی برادری کے تعاون سے تعمیر نو کے منصوبے شروع کئے جائیں۔
سینئر صوبائی وزیر سندھ شرجیل انعام میمن نے کہا کہ پنجاب میں سیلاب کی وجہ سے کھیت تباہ ہوچکے ہیں، کسان مشکلات سے دوچار، عام عوام کی زندگیاں اجیرن ہوچکی ہیں، حالیہ بارشوں اور سیلاب کے نتیجے میں پنجاب میں 21 لاکھ ایکڑ سے زائد زرعی رقبہ زیرِ آب آچکا ہے۔
شرجیل انعام میمن نے کہا کہ سیلاب اور بارشوں نے چاول، کپاس، گنے اور مکئی جیسی اہم فصلوں کو مکمل طور پر متاثر کیا ہے، سبزیوں کی بربادی کے باعث مارکیٹ میں شدید قلت اور قیمتوں میں ہوشربا اضافہ دیکھنے میں آ رہا ہے۔
سینئر صوبائی وزیر کا کہنا تھا کہ ہزاروں مویشی بھی سیلاب کی نذر ہو گئے ہیں، جو کسانوں کی جمع پونجی سمجھے جاتے تھے، نقصانات نے کسانوں کو کمر توڑ معاشی بحران میں دھکیل دیا، قومی معیشت کو بھی کاری ضرب لگائی ہے۔
انہوں نے کہا کہ مجموعی طور پر معیشت کو اربوں روپے کا نقصان پہنچ چکا ہے، ملک کو فوڈ سکیورٹی کے سنگین خطرات لاحق ہیں، وفاقی حکومت کی طرح پنجاب حکومت کی جانب سے بھی صوبے میں زرعی ایمرجنسی نافذ کرنی چاہئے۔
شرجیل میمن کا کہنا تھا کہ کسانوں کو بروقت ریلیف فراہم کرنے اور قومی فوڈ سکیورٹی سے بچنے کے لئے پنجاب میں ایگریکلچرل ایمرجنسی ناگزیر ہے، سیلاب متاثرین کے معاشی بوجھ کو کم کرنے کے لیے نہ صرف کسانوں بلکہ تمام سیلاب متاثرین کو بجلی کے بلوں سے مکمل چھوٹ دی جائے۔
سینئر صوبائی وزیر نے کہا کہ یہ وقت صرف ہمدردی کے اظہار کا نہیں بلکہ عملی اقدامات اٹھانے کا ہے، حکومت پاکستان اور حکومت پنجاب کو چاہئے کہ وہ فوری امداد کے لئے عالمی برادری اور بین الاقوامی اداروں کو اعتماد میں لے۔
انہوں نے کہا کہ عالمی برادری اور بین الاقوامی اداروں کے تعاون سے پنجاب کے عوام کے لیے بڑے پیمانے پر بحالی کے منصوبے شروع کیے جائیں، سندھ میں تباہ کن سیلاب کے بعد اکیس لاکھ گھروں کی تعمیر اور متبادل توانائی کے منصوبے شروع کیے گئے ہیں۔
شرجیل انعام میمن کا کہنا تھا کہ سندھ کے طرز پر پنجاب میں بھی بحالی اور تعمیرِ نو کے لیے منصوبہ بندی کی جائے، سندھ میں حکومت نے عالمی اداروں کے اشتراک سے نہ صرف گھر تعمیر کرائے ہیں بلکہ مفت سولر پلیٹس بھی تقسیم کی جا رہی ہیں۔
سینئر صوبائی وزیر نے کہا کہ یہی ماڈل پنجاب میں بھی اپنایا جانا چاہیے تاکہ متاثرین کو پائیدار ریلیف اور بہتر مستقبل میسر آسکے۔
شرجیل انعام میمن نے کہا کہ مشکل کی اس گھڑی میں سندھ کے عوام اور حکومت مکمل طور پر پنجاب کے بھائیوں اور بہنوں کے ساتھ کھڑے ہیں اور ہر ممکن تعاون کے لیے تیار ہیں۔
