لاہور:(دنیا نیوز) وزیراعلیٰ پنجاب مریم نواز شریف سے گرینڈ نیشنل اسمبلی آف ترکیہ کے سپیکر پروفیسر ڈاکٹر عمان کرتلمش اور آذربائیجان کی ملی مجلس کی سپیکر غفاروا نے پنجاب اسمبلی آمد پر الگ الگ ملاقاتیں کیں۔
مریم نواز شریف نے ترکیہ اور آذربائیجان کے پارلیمانی وفد کا خیر مقدم کیا، مریم نواز شریف نے پنجاب کے عوام کی جانب سے ترکیہ اور آذربائیجان کی قیادت کے لئے خیرسگالی کا پیغام دیا۔
اُنہوں نے مسئلہ کشمیر پر پاکستانی موقف کی حمایت پر دونوں ممالک کی قیادت کا شکریہ ادا کرتے ہوئے کہا کہ حالیہ بھارتی جارحیت کے دوران پاکستان کی غیر مشروط حمایت کرنے پر ترکیہ اور آذربائیجان کی قیادت کو زبردست خراج تحسین پیش کرتے ہیں۔
آذربائیجان اور ترکیہ وفد کے شرکاء نے وزیراعلیٰ مریم نواز شریف کی جانب سے شاندارمیزبانی اور پرتپاک خیر مقدم پر شکریہ ادا کیا، ملاقات میں تعلیم، صحت، آئی ٹی سمیت مختلف شعبوں میں تعاون سے متعلق امور پر تبادلہ خیال ہوا۔
وفد سے گفتگو کرتے ہوئے وزیراعلیٰ پنجاب کا کہنا تھا کہ ترکیہ اور آذربائیجان بردار ملک سے بڑھ کر ہیں، سہ ملکی اشتراک کار خوش آئند ہے، ترکیہ اور آذربائیجان ہر موقع پر پاکستان کے ساتھ کھڑے رہے، لاہور پنجاب کی روح ہے، یہاں کے لوگ محبت کرنے والے ہیں۔
مریم نواز نے کہا کہ آپریشن ”بنیان مرصوص“ میں پاکستان کی فتح دراصل دوست ممالک اور امت مسلمہ کی فتح ہے، ترکیہ اور آذربائیجان کے پارلیمانی وفود کا دورہ باہمی روابط مزید مستحکم بنائے گا، پاکستان، ترکیہ اور آذرئیجان کا پارلیمانی مکالمہ خوش آئند امر ہے۔
اُن کا کہنا تھا کہ پنجاب نے بد ترین سیلاب میں تاریخ کا سب سے بڑا ریسکیو ریلیف اور انخلا آپریشن کیا، ترکیہ اور آذربائیجان سے محبت مجھے والد محمد نواز شریف سے ورثے میں ملی، عوام کا معیار زندگی بلند کرنے کے لئے ہر پراجیکٹ میری ترجیح ہے۔
وزیراعلیٰ پنجاب نے کہا کہ چند ماہ میں 90ہزار گھر بنا کر ریکارڈ قائم کیا، ایگریکلچر میکانائزیشن کے ذریعے پنجاب کی زراعت کو نئے خطوط پر استوار کررہے ہیں، لاہور میں دنیا کا سب سے بڑا پبلک سیکٹر ہسپتال بنانے جارہے ہیں۔
مریم نواز کا کہنا تھا کہ گڈگورننس کے لئے طیب اردوان کا کے پی آئی ماڈل پنجاب میں متعارف کرایا، ستھرا پنجاب دنیا کا سب سے بڑا اور مربوط سالڈ ویسٹ مینجمنٹ پروگرام ہے، ترکیہ کا ادارہ معارف پاکستان میں قابل قدر خدمات سرانجام دے رہا ہے۔
اُنہوں نے کہا کہ پنجاب میں ایک ہزار سے زائد ٹورسٹ سائٹ اور کوریڈور متعارف کر ائے جارہے ہیں، پنجاب میں پہلی مرتبہ مذہبی،ماحولیاتی اور وائلڈ لائف ٹورازم کو متعارف کرارہے ہیں۔
وزیراعلیٰ پنجاب نے آذربائیجان کی ملی مجلس کی سپیکر غفاروا سے ملاقات پر اظہار مسرت کیا، ترکیہ اور آذربائیجان کے وفود کے شرکاء نے پنجاب میں ڈویلپمنٹ، بالخصوص تعلیم، صحت کے شعبوں میں اختراعی تبدیلیوں کو سراہا۔
ترکیہ کے سپیکر پروفیسر ڈاکٹر نعمان کرتلمش نے اپنی گفتگو میں کہا کہ پاکستان کے ساتھ کھڑے ہیں، تعلیم سمیت ہر شعبے میں اشتراک کار کے لئے تیار ہیں، پرتپاک خیرمقدم اور شاندار میزبانی پر دل کی گہرائی سے شکریہ ادا کرتے ہیں۔
سپیکر غفارواکا کہنا تھا کہ پنجاب بالخصوص لاہور خوبصورت شہر ہے، دورہ کرنا اچھا لگا، دوسری جانب سپیکر قومی اسمبلی سردار ایاز صادق اور سپیکر پنجاب اسمبلی ملک احمد کان نے بھی ترکیہ اور آذربائیجان وفود کا خیر مقدم کیا۔
