گلگت بلتستان: (دنیا نیوز) وفاقی وزیر امور کشمیر وگلگت بلتستان انجینئر امیر مقام نے کہا ہے کہ تعصب کی عینک اتار کر دیکھیں ملک میں مسلم لیگ ن کے کام نظر آئیں گے۔
امیر مقام نے مسلم لیگ ن سیکرٹریٹ میں کارکنان سے خطاب کرتے ہوئے کہا ہے کہ نواز شریف، وزیراعظم شہباز شریف اور وزیراعلیٰ مریم نواز کا ایک ہی ایجنڈا ہے کہ عوام کیلئے کوئی کام کریں، پی ٹی آئی کا سب سے بڑا گڑھ خیبرپختونخوا کو مانا جاتا ہے۔
انہوں نے کہا ہے کہ ضمنی الیکشن میں ہری پور کی عوام مسلم لیگ ن کو ووٹ دیکر واقعی تبدیلی لائے ہے جبکہ ضمنی الیکشن میں بھی مسلم لیگ ن نے ہر جگہ کلین سویپ کیا۔
امیرمقام نے کہا ہے کہ پی ٹی آئی کا امیداوار 40 ہزار ووٹوں کے فرق سے ہارا، خیبرپختونخوا کے عوام کی جتنی تعریف کریں اتنی کم ہے، جی بی اور آزاد کشمیر کے عوام ہمیشہ پاکستان کے محافظ رہے ہیں۔
رہنما مسلم لیگ ن نے مزید کہا ہے کہ پارٹی کو جب بھی موقع ملا انہوں نے عملی طور پر ثابت کر دیکھایا، ہماری خواہش ہے گلگت بلتستان کے بھی ہر ٹاؤن میں ترقی ہو، تاہم گزشتہ حکومت نے وقت ضائع کرنے کے علاوہ یہاں کچھ نہیں کیا۔
