ریاض میں رونالڈو میوزیم کو شائقین کیلئے کھول دیا گیا

Published On 24 November,2023 07:24 pm

ریاض: (دنیا نیوز) سعودی عرب کے دارالحکومت ریاض میں رونالڈو میوزیم شائقین کے لئے کھول دیا گیا۔

سعودی عرب کے دارالحکومت ریاض میں پرتگالی فٹ بال سٹار کرسٹیانو رونالڈو کے شاندار کیریئر کی نمائش کرنے والے میوزیم کا افتتاح کر دیا گیا، میوزیم میں پرتگالی آئی کون کرسٹیانورونالڈو کے شاندار کیریئر، انعامات اوریادیں رکھی گئیں ہیں۔

میوزیم میں رونالڈو کے انعامات اور شرٹس سمیت ان کے کارناموں کی نمائش دیکھنے کے لیے شائقین کا تانتا بندھ گیا، انٹرایکٹو میوزیم النصر کھلاڑی کی زندگی کی کہانی اور کیریئر سے بھرپور ہے۔

اس کے علاوہ آپ کو اس میوزیم میں ذاتی یادداشتوں اور یہاں تک کہ انٹرایکٹو گیم اور علاقوں کے ساتھ اس کی کچھ اہم ترین ٹرافیاں دیکھنے کو ملیں گی، اس عجائب گھر کا افتتاح ریاض سیزن کے ایک حصے کے طور پر کیا گیا ہے جو رونالڈو کے کیریئر کی تعریف کی عکاسی کرتا ہے۔

میوزیم میں داخل ہونے پر لوگوں کو کرسٹیانو رونالڈو کا مومی مجسمہ خوش آمدید کہتا ہے، آگے بڑھنے پر کوریڈور میں کھلاڑی کی انفرادی کامیابیوں کی عکاسی کرنے والی تصاویر کا ایک مجموعہ دکھایا گیا ہے۔

جس کے ساتھ رونالڈو کو ملنے والے مختلف تحائف اور جمع شدہ اشیا بھی شامل ہیں آنے والوں کے پاس میوزیم کے اندر ایک خصوصی سٹور سے یادگاری مصنوعات خریدنے کے لئے سٹال بھی موجود ہے۔ 

Advertisement