گوادر:(دنیا نیوز) پاک فوج کی جانب سے احسن اقدام سامنے آیا ہے ، بلوچستان کے مشہور ساحلی علاقے گوادر میں "دمیزر فٹسال گراؤنڈ" کا افتتاح کردیا گیا۔
بلوچستان کے مشہور ساحلی علاقے گوادر میں "دمیزر فٹسال گراؤنڈ" کا قیام مقامی اور ملکی سطح پر کھیلوں کے فروغ کیلئے ایک اہم پیش رفت ہے، اس کے علاوہ گوادر گارڈینز ایرینا فٹسال نگوڑی وارڈ، 9 جنوری کو شاندار افتتاح کے ساتھ عوام کے لیے کھول دیا گیا۔
یہ گراؤنڈ گوادر کے نوجوانوں کی خواہشات اور ضروریات کو مدنظر رکھتے ہوئے پاک فوج نے صرف دو ماہ کی قلیل مدت میں مکمل کی، ماضی میں بھی پاک فوج ہمیشہ کھیلوں کے فروغ اور نوجوانوں کو نئے مواقع فراہم کرنے میں پیش پیش رہی ہے۔
بلاشبہ بلوچستان کے نوجوان کھیلوں کے میدان میں اپنی زبردست صلاحیتوں کا مظاہرہ کر رہے ہیں، اور ایسے منصوبے ان کی صلاحیتوں کو نکھارنے اور ترقی کے مزید مواقع فراہم کرنے میں معاون ثابت ہوں گے۔
ایرینا فٹسال نوجوانوں کے لیے امید کی کرن ہے اور یہ بلوچستان کی ترقی و خوشحالی کا پیش خیمہ ثابت ہوگا۔
