دبئی: (ویب ڈیسک) دبئی میں ہونے والی گلوبل پاور لفٹنگ اینڈ باڈی بلڈنگ انٹرنیشنل چیمپئن شپ میں پاکستان کے جواد احمد نے شاندار کارکردگی دکھاتے ہوئے بھارت کے سندیپ سنگھ کو شکست دے کر گولڈ میڈل جیت لیا۔
گلوبل پاور لفٹنگ اینڈ باڈی بلڈنگ انٹرنیشنل چیمپئن شپ میں بھارت، سری لنکا، دبئی، جرمنی، فرانس، جنوبی افریقا، میکسیکو، فن لینڈ، اٹلی اور برطانیہ سمیت متعدد ممالک کے ماہر کھلاڑیوں نے شرکت کی۔
سرگودھا سے تعلق رکھنے والے جواد احمد نے ماسٹر کلاس سمیت اوور آل کلاس میں بھی پہلی پوزیشن حاصل کر کے دنیا بھر میں پاکستان کا نام روشن کر دیا، بھارتی کھلاڑیوں کیخلاف سخت اور سنسنی خیز مقابلے کے بعد جواد نے گولڈ میڈل اپنے نام کیا جبکہ بھارت کو چاندی اور سری لنکا کو کانسی کا تمغہ ملا۔
میڈیا سے گفتگو کرتے ہوئے جواد احمد کا کہنا تھا کہ یہ میرے لیے بہت بڑا اعزاز ہے کہ میں نے پاکستان کیلئے عالمی سطح پر گولڈ میڈل جیتا، ماسٹر کلاس اور اوور آل کلاس میں بھارتی کھلاڑیوں کو پیچھے چھوڑنا میرے کیریئر کا سب سے بڑا لمحہ ہے۔
جواد احمد نے مزید کہا کہ میں یہ کامیابی اپنی قوم، کوچز اور ان سب لوگوں کے نام کرتا ہوں جنہوں نے میرے لیے دعائیں کیں۔
