اسلام آباد: (دنیا نیوز) قومی باکسر شاہزیب رند سے کئے گئے حکومتی وعدوں اور اعلانات پر عملدرآمد نہ ہو سکا، وزیراعظم شہباز شریف نے نوٹس لے لیا۔
وفاقی وزیر اطلاعات عطا تارڑ نے شاہزیب رند سے انعامی اعلانات اور وعدوں پر عملدرآمد نہ ہونے پر معذرت کر لی اور کہا کہ ہم اس غیر منصفانہ تاخیر پر دل سے معذرت خواہ ہیں۔
عطا تارڑ نے سماجی رابطے کی سائٹ ایکس پر اپنے پیغام میں کہا ک آپ جیسے کھلاڑی ہمارے اصل ہیرو ہیں، ہم آپ کی کامیابیوں کے دل سے قدردان ہیں، آپ نے ملک کے وقار میں اضافہ کیا ہم سب کو آپ پر فخر ہے۔
وفاقی وزیر نے کہا کہ وزیراعظم شہباز شریف نے آپ سے کئے گئے وعدوں پر عملدرآمد نہ ہونے کا سختی سے نوٹس لیا ہے، اس مسئلے کو جلد سے جلد حل کیا جائیگا۔
— Attaullah Tarar (@TararAttaullah) July 26, 2025
عطا تارڑ نے کہا کہ وزیراعظم نے مستقبل میں ایسی غلطی نہ دہرائے جانے کی ہدایت بھی کی ہے، ہم اس غیر منصفانہ تاخیر پر شرمندہ ہیں۔
واضح رہے کہ قومی باکسر شاہزیب رند نے مختلف حکومتی عہدیداروں اور شخصیات کی جانب سے وعدے وفا نہ کرنے پر حکومت کو آڑے ہاتھوں لیا تھا۔
سوشل میڈیا پوسٹ میں شاہزیب رند نے سیاستدانوں کو بدعنوان قرار دیا اور کہا تھا کہ وزیراعظم نے میرے لئے 50 لاکھ نقد اور میرے تربیتی پروگرام کے لئے 8 کروڑ روپے کی رقم کا اعلان کیا تھا۔
شاہزیب رند نے کہا کہ مجھے وزیراعظم کی طرف سے اعلان کردہ رقم میں سے ایک پیسہ بھی موصول نہیں ہوا۔
