دبئی: (دنیا نیوز) معروف پرتگالی فٹبالر کرسٹیانو رونالڈو نے مسلسل تیسری بار مشرقِ وسطیٰ کے بہترین فٹبالر آف دی ایئر کا اعزاز اپنے نام کر لیا۔
یہ اعزاز دبئی میں منعقد ہونے والی گلوب سوکر ایوارڈز کی تقریب میں دیا گیا جہاں کرسٹیانو رونالڈو نے کریم بنزیما، سالم الدوسری اور ریاض محرز جیسے نامور کھلاڑیوں کو پیچھے چھوڑتے ہوئے یہ اعزاز حاصل کیا۔
رونالڈو نے سال 2025 کے دوران تمام مقابلوں میں مجموعی طور پر 40 گول سکور کیے، جو ان کی شاندار فارم اور مستقل کارکردگی کا واضح ثبوت ہے، اس وقت وہ سعودی عرب کے معروف فٹبال کلب النصر کی نمائندگی کر رہے ہیں جہاں ان کا معاہدہ 2027 کے وسط تک ہے۔
ایوارڈ وصول کرتے ہوئے کرسٹیانو رونالڈو کا کہنا تھا کہ مزید کھیلنا بظاہر مشکل ہوتا جا رہا ہے تاہم وہ کھیل جاری رکھنے کے لیے پُرعزم ہیں، اگر انجری نہ ہوئی تو وہ ایک ہزار گول کرنے کا ہدف حاصل کرنے کی پوری کوشش کریں گے۔
