نیویارک: (ویب ڈیسک) انسانی حقوق کے کارکنوں اور سول سوسائٹی کی تنظیموں نے سوشل میڈیا پلیٹ فارم کی بندش پر گہری تشویش کا اظہار کرتے ہوئے ایکس (ٹوئٹر) کو فوری طور پر دوبارہ بحال کرنے کا مطالبہ کر دیا۔
پاکستان میں سوشل میڈیا پلیٹ فارم ایکس تک رسائی میں ملک بھر میں پڑنے والے خلل کو ایک ماہ سے زائد کا عرصے گزر چکا ہے، آج بھی ایکس لاکھوں صارفین کیلئے ناقابل رسائی ہے۔
انسانی حقوق کے کارکنوں اور سول سوسائٹی کی تنظیموں نے ایکس کی بحالی کیلئے سوشل میڈیا پر انٹرنیٹ کھولو کے ہیش ٹیگ استعمال کر کے مہم شروع کی تاکہ حکومت کی اس جانب توجہ دلائی جاسکے۔
مشترکہ بیان میں پاکستان ٹیلی کمیونیکیشن اتھارٹی (پی ٹی اے) کی مسلسل خاموشی اور ایسے اقدامات کی کوئی وجہ پیش کرنے میں ناکامی پر بھی تنقید کی گئی۔
بیان میں کہا گیا کہ اس طرح کے اقدامات نہ صرف مختلف سیاسی آوازوں کو خاموش کر دیتے ہیں بلکہ غلط معلومات کو پھیلنے کا خدشہ بڑھ جاتا ہے۔
سول سوسائٹی نے پاکستان میں ڈیجیٹل سنسرشپ کو واپس لینے کیلئے فوری کارروائی کا مطالبہ کیا۔
یاد رہے کہ ملک میں 8 فروری کو ہونے والے عام انتخابات کے دن انٹرنیٹ کو بھی مکمل طور پر بند کر دیا گیا تھا، سوشل میڈیا پلیٹ فارم ایکس کی بحالی سے متعلق عدالتوں کے احکامات کے باوجود عوام کو وقفے وقفے سے بندش کا سامنا کرنا پڑ رہا ہے۔
