کیلی فورنیا:(ویب ڈیسک ) اینڈرائیڈ اور آئی او ایس فونز پر استعمال کیے جانے فون میسج المعروف گوگل میسج سروس سے جلد ہی صارفین واٹس ایپ کال کر سکیں گے۔
ٹیکنالوجی ویب سائٹ کی رپورٹ کے مطابق گوگل میسج پر ایک نئے فیچر کی آزمائش کی جا رہی ہے، جس کے تحت صارفین میسج سروس پر رہتے ہوئے واٹس ایپ پر کال کر سکیں گے۔
مذکور فیچر کے تحت جیسے ہی کوئی صارف کسی دوسرے صارف کو میسج کر رہا ہوگا تب میسج کے اوپر ویڈیو آئیکون کے ساتھ واٹس ایپ کا آئیکون بھی نظر آئے گا۔
آئیکون کو کلک کرتے ہی صارف دوسرے صارف کے نمبر پر واٹس ایپ کال پر منتقل ہوجائے گا، تاہم ایسا ہونے کے باوجود وہ گوگل کے میسج پر ہی رہے گا۔
فیچر کے تحت کال ختم ہونے کے بعد صارف گوگل میسج پر ہی رہے گا اور یہ فیچر اس وقت ہی کام کرے گا جب دونوں صارفین کے واٹس ایپ اکاؤنٹ بنے ہوئے ہوں گے۔
خیال رہے فیچر پر ابھی گوگل کے ماہرین کام کر رہے ہیں، اس پر کام مکمل ہونے کے بعد اس پر آزمائش شروع کی جائے گی، جس کے بعد اسے پیش کیے جانے کا امکان ہے، ممکنہ طور پر مذکورہ فیچر کو رواں برس ہی پیش کیا جائے گا، تاہم اس حوالے سے کچھ بھی کہنا قبل از وقت ہے۔
یہاں یہ بات بھی یاد رہے کہ حالیہ چند سالوں میں جہاں فون میسجز کے استعمال میں کمی واقع ہوئی ہے، وہیں گوگل نے میسج سروس کو بھی جدید فیچرز سے لیس کردیا ہے۔
اب صارفین میسج سروس کے ذریعے بھی تصاویر اور ویڈیوز کا تبادلہ کر سکتے ہیں اور گوگل میسج کی سروس ایک طرح سے واٹس ایپ میسنجر کی طرح استعمال کی جا سکتی ہے۔
واضح رہے گوگل نے کچھ سال قبل ہی شارٹ میسجنگ سروس (ایس ایم ایس) کو رچ کمیونیکشن سروس (آر سی ایس) انٹرنیٹ ٹیکنالوجی میں تبدیل کیا تھا، جس کے تحت اسے واٹس ایپ کی طرح بھی استعمال کیا جا سکتا ہے۔
