لندن: (ویب ڈیسک) برطانیہ کے سائنس دانوں نے مائیکرو ویو سے متاثر ہو کر ایک ایسی ڈیوائس بنائی ہے جو چاند پر پینے کا پانی بنا سکتی ہے، اس طرح اب چاند پر موجود پانی کو صاف کرنے کیلئے ڈیوائس تیار ہوچکی ہے، یہ ڈیوائس بنا کر سائنسدانوں نے ڈیڑھ لاکھ ڈالر کا انعام جیت لیا ہے۔
گولسٹر شائر کے مقامی ادارے نے ایک جدید سسٹم بنایا ہے جو چاند کی سرزمین کے نیچے موجود پانی کو صاف کر سکتا ہے۔
کچن کے مائیکرو ویو کی ٹیکنالوجی سے متاثر ہو کر بنایا گیا یہ پانی میں موجود آلودہ مرکبات کو ڈیفراسٹ اور تحلیل کرنے کیلئے مائیکرو ویو اور الٹرا ساؤنڈ کا استعمال کرتا ہے۔
یہ ٹیکنالوجی خلا بازوں کیلئے پینے کا صاف پانی بنا سکتی ہے جو کہ طویل مدتی قمری مشنز پر جانے والوں کیلئے ایک اہم قدم ہے۔
ادارے کے ٹیکنیکل ڈائریکٹر کا کہنا ہے کہ انہوں نے منفی 200 سیلسیئس درجہ حرارت میں جہاں مکمل طور پر ویکیوم ہے، انتہائی کم کشش ثقل ہے اور بہت قلیل برقی توانائی ہے، میں پانی کے مسئلے کو حل کرنے کی کوشش کی ہے۔
