نیویارک: (ویب ڈیسک) آرٹیفیشل انٹیلی جنس (اے آئی) پلیٹ فارم چیٹ جی پی ٹی اور گروک سمیت متعدد اے آئی اور دوسرے تصاویر بنانے والے پلیٹ فارمز نے اینمیٹڈ تصاویر بنانے کے فیچرز پیش کر دیئے۔
چیٹ جی پی ٹی نے حال ہی میں جاپان کے معروف اینیمیٹڈ سٹوڈیو ’جیبلی اسٹوڈیو‘ (Studio Ghibli) کے انداز کی تصاویر بنانے کے مفت فیچر تک صارفین کو محدود رسائی دی ہے، چیٹ جی پی ٹی کے صارفین یومیہ 3 تصاویر کو مفت میں جیبلی سٹوڈیو انداز کی اینیمیشن میں بنا سکتے ہیں۔
چیٹ جی پی ٹی کی طرح دیگر اے آئی پلیٹ فارمز سمیت دوسری ایپلی کیشنز نے بھی جیبلی سٹوڈیو کی اینیمیشن تصاویر بنانے کے فیچر تک صارفین کو رسائی دے دی۔
چیٹ جی پی ٹی اور ایکس کے گروک سمیت دیگر اے آئی پلیٹ فارمز پر اینیمیٹڈ تصاویر کو بنانا انتہائی آسان ہے اور چند ہی سیکنڈز میں جیبلی سٹوڈیو انداز کی تصویر بن کر سامنے آجاتی ہے۔
جیبلی سٹوڈیو کے انداز کی تصویر بنانے کیلئے صارفین کوئی بھی تصویر چیٹ جی پی ٹی یا گروک سمیت دیگر پلیٹ فارمز پر اپ لوڈ کرنے کے بعد انہیں صرف ہدایات دیتا ہے کہ تصویر کو جیبلی سٹوڈیو انداز میں تبدیل کریں ( turn this image in Studio Ghibli theme) تو دی گئی تصویر اینیمیٹڈ بن کر آجاتی ہے۔
جیبلی سٹوڈیو کے طرز کی تصاویر چیٹ جی پی ٹی، گروک، پرزما، لونا پک، فوٹوفونیا، فلکس، بی فنکے اور فوٹر سمیت ڈیپ ڈریم جنریٹر ویب سائٹ پر بھی بنائی جا سکتی ہیں۔
جہاں ایک طرف دنیا بھر میں جیبلی سٹوڈیو طرز کی تصاویر بنانے کے ٹرینڈ میں اضافہ ہوا ہے، وہیں بعض ماہرین اسے ذاتی تصاویر کے اے آئی پر غلط استعمال کے خطرے سے بھی خبردار کر رہے ہیں۔
خیال رہے کہ سٹوڈیو جیبلی جاپان کا معروف اینیمیٹڈ فلم اور کتاب ساز ادارہ ہے، جسے 1985 میں بنایا گیا تھا۔
