کیلیفورنیا: (ویب ڈیسک) ایپل کے نئے موبائل آئی فون فولڈ کا ڈسپلے اور کیمرہ سیٹ اپ کیسا ہوگا، اس حوالے سے نئی دلچسپ تفصیلات سامنے آگئیں۔
توقع ہے کہ اگلے سال ایپل بھی فولڈ ایبل سمارٹ فون ڈیوائسز بنانے کی دوڑ میں داخل ہو جائے گا جسے آئی فون فولڈ کا نام دیا جا رہا ہے، تاہم اس کے حتمی پروڈکٹ کے نام کی ابھی تک کوئی آفیشل تصدیق سامنے نہیں آئی ہے۔
ایپل کے نئے فولڈ ایبل ڈیوائس کے بارے میں نئی تفصیلات اب معروف ویب سائٹ ڈیجیٹل چیٹ سٹیشن کی ویبو پر ایک پوسٹ کے ذریعے سامنے آئی ہیں۔
لیک ہونے والی تفصیلات کے مطابق آئی فون فولڈ میں بائیو میٹرک تصدیق کیلئے سائیڈ ماونٹڈ فنگر پرنٹ سینسر کا استعمال کیا جائے گا، رپورٹ سے پتہ چلتا ہے کہ ایپل ڈیوائس میں فیس آئی ڈی شامل نہیں ہوگی اور نہ ہی انڈر ڈسپلے فنگر پرنٹ سکینر پر انحصار کیا جائے گا۔
ایپل کا نیا موبائل بک سٹائل کے فولڈ ایبل ڈیزائن کی طرح ہوگا جو فی الحال مارکیٹ میں سب سے زیادہ فولڈ ایبل سمارٹ فونز استعمال کرتے ہیں۔
مرکزی فولڈنگ ڈسپلے کی پیمائش 7.58 انچ بتائی جا رہی ہے اور مبینہ طور پر اس میں انڈر ڈسپلے سیلفی کیمرہ بھی موجود ہوگا، بیرونی کور سکرین کی پیمائش 5.25 انچ بتائی جا رہی ہے اور اس میں سامنے والے کیمرے کے لئے ہول پنچ کٹ آؤٹ بھی شامل ہوگا۔
آئی فون فولڈ میں ڈوئل کیمرہ سسٹم کی خصوصیت کی توقع ہے، بتایا جا رہا ہے کہ سینسر میں کم از کم ایک ایم پی 48 ریزولوشن کیمرہ پیش کیا جائے گا، تاہم دوسرے کیمرے کے بارے میں مزید تفصیلات اب تک سامنے نہیں آئیں۔
ماہرین کو توقع ہے کہ آئی فون فولڈ 2026 میں صارفین کیلئے لانچ کیا جائے گا اور فولڈ ایبل سمارٹ فون مارکیٹ پر اس کے کیا اثرات مرتب ہوں گے یہ اس کے لانچ ہونے کے بعد واضح ہوگا۔
