سہارنپور: (ویب ڈیسک) بھارت میں شادی سے متعلق آئے دن عجیب وغریب خبریں سامنے آتی رہتی ہیں جہاں معمولی معمولی باتوں پر باراتیں واپس لوٹ جاتیں یا لڑکی والے شادی سے انکار کر دیتے ہیں۔
ایسا ہی عجیب واقعہ ایک بار پھر بھارت میں پیش آیا ہے جہاں دلہا کے مطالبے پر دلہن والوں نے باراتیوں کو یرغمال بنا لیا۔
بھارتی میڈیا کے مطابق سہارنپور ضلع کے ایک گاؤں میں شادی کا منڈپ اس وقت دنگل میں تبدیل ہوگیا جب دلہا نے جہیز میں ملنے والی چھوٹی گاڑی کو مسترد کرتے ہوئے بڑی گاڑی کا مطالبہ کر دیا۔
رپورٹ کے مطابق دلہا کے ساتھ اس کے گھر والے بھی اس ناجائز مطالبے پر ڈٹ گئے اور مطالبہ پورا نہ ہونے پر شادی نہ کرنے اور بارات واپس لے جانے کی دھمکی تک دے ڈالی، پہلے تو دلہن والوں نے بات چیت سے مسئلہ حل کرنے کی کوشش کی، تاہم لڑکے والوں کے ہٹ دھرمی پر قائم رہنے پر وہ بھی غصہ میں آ گئے اور پوری بارات کو یرغمال بنا لیا۔
رپورٹ کے مطابق اس موقع پر دونوں طرف سے مداخلت کی گئی جس کے بعد لڑکی والوں نے دلہا اور اس کے 20 قریبی رشتے داروں کو روک لیا اور باقی کو واپس جانے دیا۔
اطلاعات کے مطابق رات گئے تک فریقین میں تصفیہ کیلئے مذاکرات جاری تھے تاہم معاملہ کسی نہج پر نہیں پہنچا تھا۔
