سرینگر: (دنیا نیوز) مقبوضہ وادی میں بھارتی مظالم کو 40 روز مکمل ہوگئے، بھارتی فوج نے 5 اگست سے وادی میں، مارکیٹ، بزنس اور پبلک ٹرانسپورٹ بند کر رکھا ہے، ادویات کی کمی کی وجہ سے مریض جان سے ہاتھ دھونے لگے۔
ہر گزرتے دن کے ساتھ کشمیریوں کی زندگی مشکل ترین ہوتی جا رہی ہے، گھروں میں قید کشمیریوں تک خوراک، دودھ اور ادویات ختم ہوگئیں۔ سورہ ہسپتال میں ڈاکٹرز کے مطابق لاک ڈاؤن اور ادویات کی کمی کی وجہ سے روزانہ 6 مریض اپنی جان سے ہاتھ دھو رہے ہیں۔ دہلی میں ڈاکٹرز کی ایک ٹیم نے حکومت سے مطالبہ کیا ہے کہ انہیں وادی جانے کی اجازت دی جائے، بھارتی فوج ہزاروں لوگوں کو گرفتار کرچکی ہے۔
ادھر چار امریکی سینیٹرز نے مقبوضہ کشمیر میں جاری انسانی حقوق کی خلاف ورزیوں پر گہری تشویش کا اظہار کرتے ہوئے صدر ٹرمپ سے کشمیریوں کی مدد کرنے اور وہاں جنم لیتے انسانی المیے کو جلد ختم کرانے کا مطالبہ کر دیا ہے۔
