کابل: (ویب ڈیسک) انسانی حقوق کی خلاف ورزیوں پر یورپی یونین نے طالبان حکومت کے متعدد اعلیٰ عہدیداروں پر نئی پابندیاں عائد کی ہیں۔
غیر ملکی میڈیا کی رپورٹ کے مطابق یورپی یونین کی کونسل نے ایک بیان جاری کرتے ہوئے کہا کہ اس نے طالبان کے چیف جسٹس عبدالحکیم حقانی، وزیر انصاف عبدالحکیم شرعی اور طالبان کے قائم مقام وزیر تعلیم مولوی حبیب اللہ آغا پر لڑکیوں کوتعلیم سے محروم کرنے پر پابندیاں عائد کیں۔
کونسل نے کہا کہ اس نے طالبان کے ارکان سمیت 18 افراد اور پانچ اداروں کو افغانستان، جنوبی سوڈان، وسطی افریقی جمہوریہ، یوکرین اور روس میں انسانی حقوق کی سنگین خلاف ورزیوں پر پابندیاں عائد کی ہیں۔
یورپی یونین نے کہا کہ جن ممالک کا ذکر کیا گیا ہے وہاں عام شہریوں کو منظم طریقے سے جنسی تشدد کا نشانہ بنایا جاتا ہے، جن افراد کو بلیک لسٹ کیا گیا ہے وہ پابندیوں کو دہشت پھیلانے کے لیے استعمال کرتے ہیں۔
