جکارتہ: (ویب ڈیسک) انڈونیشیا کے حکام نے ساحل کے قریب کم از کم 75 روہنگیا مہاجرین جن میں چار بچے شامل ہیں کو کشتی سے اترنے سے روک دیا۔
عالمی میڈیا کی رپورٹ کے مطابق سکیورٹی اہلکاروں نے روہنگیا مہاجرین کو صوبہ آچے کے لیوگے ساحل پر اترنے کی اجازت نہیں دی اور انہیں کشتی میں ہی رکنے کا حکم دیا جس کی وجہ سے مہاجرین کشتی میں پھنس گئے۔
لیوگے ساحل پر موجود مقامی افسر نے بتایا کہ مقامی لوگوں نے کشتی میں سوار مہاجرین کو کھانے پینے کی اشیاء فراہم کیں اور کشتی کی تصاویر لی ہیں جبکہ ساحل پر پولیس تعینات ہے۔
واضح رہے کہ روہنگیا مسلمانوں کو میانمار میں ظلم و ستم کا سامنا ہے اور ہر سال ہزاروں افراد اپنی جان کی پروا ہ کئے بغیر ملائیشیا یا انڈونیشیا پہنچنے کے لئے خطرناک سمندری راستہ اختیار کرتے ہیں۔
