واشنگٹن: (دنیا نیوز) امریکی صدر ڈونلڈ ٹرمپ سے بھارتی وزیراعظم نریندر مودی نے ملاقات کی، ملاقات میں امریکی صدر نے بھارت کو تیل اور گیس فراہم کرنے کا اعلان کیا۔
بھارتی وزیراعظم نریندر مودی کی وائٹ ہاؤس میں امریکی صدر ڈونلڈ ٹرمپ سے ملاقات ہوئی، بھارت کے وزیراعظم نریندر مودی اور امریکی صدر ڈونلڈ ٹرمپ نے ملاقات کے بعد نیوز کانفرنس کی۔
امریکی صدر ڈونلڈ ٹرمپ کا کہنا تھا کہ بھارتی وزیراعظم سے ملاقات کرکے خوشی ہوئی، ہمارے پاس بہت تیل اور گیس ہے جو بھارت کو دے سکتے ہیں، وزیراعظم مودی بھارت میں بہت اچھا کام کر رہے ہیں،بڑے لیڈر ہیں۔
بھارتی وزیراعظم نریندر مودی نے کہا کہ ڈونلڈ ٹرمپ کو صدر منتخب ہونے پر بھارت کی طرف سے مبارک باد دیتا ہوں، خوشی ہے کہ دوبارہ ٹرمپ کے ساتھ کام کا موقع مل رہا ہے۔
نریندر مودی نے مزید کہا کہ خوشی ہوئی کہ یہاں آتے ہی ٹرمپ نے احمد آباد نمستے ٹرمپ کی یاد دلا دی، یقین ہے کہ ٹرمپ کے دوسرے دور میں بھی دونوں ممالک کے تعلقات پر اسی رفتار سے آگے بڑھیں گے، آنے والے چار سال میں دونوں ممالک کے درمیان زیادہ رفتار سے کام کریں گے۔
بھارتی وزیراعظم کا کہنا تھا کہ ہمارے ملنے کا مقصد ایک اور ایک دو نہیں ایک اور ایک گیارہ ہوتا ہے، ٹرمپ سے ایک بات سیکھی ہے کہ وہ قومی مفاد کو ترجیحات میں سرفہرست رکھتے ہیں، خوشی ہے کہ ٹرمپ نے جنگ ختم کرنے کے لئے پیوٹن سے بات کی، بھارت نیوٹرل نہیں بھارت کا اپنا مؤقف ہے اور ہمارا مؤقف امن ہے۔
بھارتی وزیراعظم نے کہا کہ روسی صدر سے کہا تھا کہ یہ وقت جنگ کا نہیں امن کا ہے، شروع دن سے مؤقف ہے کہ جنگ مسئلے کا حل نہیں مذاکرات ہیں۔
اس سے قبل مودی کی ایلون مسک سے ملاقات میں انٹرنیٹ سروس اسٹارلنک کی جنوبی ایشیا مارکیٹ میں فراہمی پر بات چیت ہوئی۔
