دبئی: (ویب ڈیسک) متحدہ عرب امارات کے ویزا سے متعلق نئی ہدایات جاری کردی گئی ہیں۔
یو اے ای سفارتخانے کے ترجمان کے مطابق ویزا فیس فی کس 69 امریکی ڈالر مقرر کی گئی ہے جبکہ تمام ویزوں کے لیے درخواست آن لائن جمع کرانا ضروری ہو گی۔
ترجمان کے مطابق ویزا اپلائی کرنے کے بعد نوٹیفکیشن جاری کیا جائے گا اور درخواست دہندگان کو ضروری دستاویزات اپنے ساتھ رکھنی ہوں گی۔
یو اے ای سفارتخانے کے ترجمان نے بتایا کہ بینک سٹیٹمنٹ میں کم از کم 5 ہزار امریکی ڈالر یا مساوی رقم ہونا لازمی ہے، سفارتخانے میں درخواست جمع کراتے وقت ہوٹل یا رہائش کا ثبوت فراہم کرنا ہو گا جبکہ کنفرم ریٹرن ٹکٹ بھی دکھانا ضروری ہو گا۔
ویزا کے لیے پاسپورٹ کی میعاد کم از کم 6 ماہ ہونا لازمی ہے اور ویزا فیس مخصوص الفلاح بینک اکاؤنٹ میں جمع کرانی ہوگی۔
اس کے علاوہ بچوں کے ویزا سے متعلق بھی نئی ہدایات جاری کی گئی ہیں۔
5 سال سے کم عمر بچوں کو ویزا سینٹر جانے کی ضرورت نہیں جبکہ 6 سے 15 سال کے بچوں کی تصویر ویزا سینٹر میں لی جائے گی، 15 سال یا اس سے زائد عمر کے بچوں کا ویزا سینٹر جانا لازمی ہو گا۔
ترجمان کے مطابق بائیو میٹرک تصدیق اور ویزا پراسیسنگ کا عمل ویزا سینٹر میں مکمل کیا جائے گا۔
