غزہ: (ویب ڈیسک) متحدہ عرب امارات کی جانب سے انسانی امداد کے 10 قافلے غزہ کی پٹی میں داخل ہوگئے۔
مقامی میڈیا کے مطابق متحدہ عرب امارات کی جانب سے انسانی امداد کے 10 قافلے مصری رفح کراسنگ کے ذریعے غزہ کی پٹی میں داخل ہوئے، یہ امداد ’’مدر آف دی نیشن‘‘ شیخہ فاطمہ بنت مبارک کی فراخدلانہ عطیہ کے طور پر فراہم کی گئی ہے، جو جنرل ویمنز یونین کی چیئرپرسن، سپریم کونسل برائے ماں و بچہ کی صدر اور فیملی ڈویلپمنٹ فاؤنڈیشن کی سپریم چیئرپرسن ہیں۔
یہ امدادی قافلے فلسطینی عوام کے لیے یو اے ای کے جاری انسانی ہمدردی کے مشن کا حصہ ہیں، جن کا مقصد متاثرہ افراد کو ضروری سہولیات فراہم کرنا اور ان کی مشکلات کم کرنا ہے۔
175 ٹرکوں پر مشتمل ان قافلوں میں 2,400 ٹن سے زائد امدادی سامان شامل ہے، جس میں خوراک کی اشیاء، طبی سازوسامان، بچوں کے لئے غذائی سپلیمنٹس، کھجوریں، شیلٹر کے لئے خیمے، لباس اور دیگر بنیادی ضروریات کی اشیاء موجود ہیں۔
واضح رہے کہ یو اے ای فلسطینی عوام کی مسلسل انسانی امداد میں پرعزم ہے تاکہ ان کے مشکل حالات کو کم کیا جا سکے، سب سے زیادہ متاثرہ افراد کی تکالیف میں کمی لائی جا سکے اور ان کی بنیادی ضروریات پوری کی جا سکیں۔
