واشنگٹن: (دنیا نیوز) شدید طوفانی ہواؤں اور آندھیوں نے امریکا کےوسطی اور جنوبی علاقوں کو لپیٹ میں لے لیا، خوفناک طوفانی بگولوں سے 40 سے زائد افراد ہلاک جبکہ درجنوں زخمی ہو گئے۔
امریکی میڈیا کے مطابق امریکی ریاست میسوری طوفان سے سب سے زیادہ متاثر ہوا جہاں 12 افراد ہلاک ہوئے، امریکی ریاستوں ٹیکساس اور آرکنساس میں طوفانی بگولوں نے 12 افراد کی جانیں لیں، امریکی صدر ٹرمپ نے آر کنساس میں نیشنل گارڈ کو امدادی کارروائیوں کیلئے بھیج دیا۔
میڈیا رپورٹس میں بتایا گیا کہ امریکی ریاست اوکلاہوما میں طوفانی بگولوں کے سبب جنگلات میں 150 سے زائد مقامات پر آگ بھڑک اُٹھی، 8امریکی ریاستوں میں 3لاکھ 20 ہزار سے زائد گھر بجلی سے محروم ہو گئے۔
امریکی محکمہ موسمیات نے پیشگوئی کی ہے کہ ریاست مسیسپی، مشرقی لوزیانا اور مغربی ٹینیسی کے بھی طوفان کی زد میں آنے کا خدشہ ہے۔
