غزہ: (دنیا نیوز)غزہ میں صہیونی فورسز کے حملوں آج صبح سے اب تک مزید 47 فلسطینی شہید ہوگئے۔
غیر ملکی خبر رساں ایجنسی کی رپورٹ کے مطابق میڈیکل ذرائع نے مقامی نمائندوں کو بتایا کہ صبح سویرے سے اب تک غزہ بھر میں حملوں کے نتیجے میں کم از کم 28 افراد شہید ہو چکے ہیں۔
الجزیرہ کے مطابق ان میں سے ان میں سے 27 افراد غزہ شہر اور شمالی اور جنوبی غزہ کی پٹی کے علاقوں میں شہید کیے گئے، ان میں سے کئی افراد کو امدادی مراکز کے قریب حملے کرکے شہید کیا گیا۔
غزہ کے سرکاری میڈیا آفس کا کہنا ہے کہ پانی کے لیے قطار میں کھڑے لوگوں پر حملوں میں مجموعی طور پر اب تک 700 سے زائد فلسطینی شہید ہو چکے ہیں، جسے انہوں نے ’پیاس کی منظم جنگ‘ قرار دیا ہے۔
سرکاری میڈیا کے مطابق اسرائیلی فوج نے 112 تازہ پانی بھرنے کے مقامات کو نشانہ بنایا اور 720 پانی کے کنوؤں کو تباہ کر کے انہیں ناکارہ بنا دیا، جس کی وجہ سے 12 لاکھ 50 ہزار سے زائد لوگ صاف پانی سے محروم ہو گئے۔
یہ بھی پڑھیں: اٹلی سے غزہ کیلئے امدادی کشتی روانہ، اسرائیلی ناکہ بندی توڑنے کا اعلان
بیان میں کہا گیا ہے کہ ’ ہم اس نسل پرستانہ پالیسی کو جنیوا کنونشنز کے تحت مکمل جنگی جرم اور بین الاقوامی انسانی حقوق و انسانی ہمدردی کے قانون کی سنگین خلاف ورزی قرار دیتے ہیں۔’
میڈیا آفس نے کہا کہ اسرائیل نے ماہانہ ایک کروڑ 20 لاکھ لیٹر ایندھن کی آمد پر پابندی لگا رکھی ہے، جو کم از کم پانی کے کنوؤں، سیوریج ٹریٹمنٹ پلانٹس، کچرا اٹھانے والی گاڑیوں اور دیگر اہم سروسز کو چلانے کے لیے ضروری ہے۔
بیان کے مطابق اس پابندی نے ’ پانی اور نکاسی آب کے نظام کو تقریباً مکمل طور پر مفلوج کر دیا ہے اور اس کی وجہ سے خاص طور پر بچوں میں تیزی سے بیماریاں پھیل رہی ہیں۔’
9 مارچ کو اسرائیل نے وسطی غزہ کے دیر البلح علاقے میں آخری واٹر ڈی سیلینیشن پلانٹ کو بجلی فراہم کرنے والی آخری لائن بھی منقطع کر دی تھی جس سے بڑی مقدار میں پینے کے پانی کی پیداوار رک گئی اور علاقے میں پانی کا بحران مزید شدید ہو گیا۔
فلسطینی وزارتِ صحت نے گزشتہ روز بتایا تھا کہ اسرائیل کی جنگ میں اب تک مجموعی طور پر تصدیق شدہ شہادتوں کی تعداد 58 ہزار 26 ہو گئی ہے اور کم از کم ایک لاکھ 38 ہزار 500 افراد زخمی بھی ہوئے ہیں۔
