غزہ: (دنیا نیوز) قابض اسرائیل کی غزہ میں بربریت کا سلسلہ تھم نہ سکا۔
24 گھنٹے میں صیہونی حملوں میں مزید 60 فلسطینی شہید جبکہ 344 زخمی ہوگئے، امداد کے منتظر 38 فلسطینی بھی اسرائیلی فائرنگ کا نشانہ بن گئے، غذائی قلت سے مزید 5 افراد جاں بحق ہوگئے۔
قحط سے اب تک 112 بچوں سمیت 263 افراد جاں بحق ہو چکے، غزہ میں شہدا کی تعداد 62 ہزار سے زائد ہوگئی، 1 لاکھ 56 ہزار 230 افراد زخمی ہوچکے۔
واضح رہے کہ گزشتہ دنوں کئے جانے والے حملوں کے حوالے سے اسرائیل کی فوج کا کہنا تھا کہ اس نے حملوں میں درست مقدار میں بارود کا استعمال کیا ہے جب کہ اس علاقے کی فضائی نگرانی بھی کی جا رہی تھی، اس کے ساتھ ساتھ درست نشانے کے لئے دیگر ذرائع کا بھی استعمال کیا گیاتھا۔
اسرائیلی فوج نے فوری طور پر یہ واضح نہیں کیا تھا کہ آیا اس علاقے میں عام شہریوں کی ہلاکتوں سے بچنے کے لئے کیا اقدامات کئے گئے تھے۔
اسرائیلی اخبار ’ٹائمز آف اسرائیل‘ نے بتایا تھا کہ حماس کے زیرِ انتظام غزہ کے محکمہ صحت کے طبی حکام کا کہنا ہے کہ المواصی میں ہونے والے میزائل حملوں میں 40 افراد ہلاک ہوئے تھے جن میں خواتین اور بچے شامل ہیں جب کہ کئی خاندانوں کے تمام افراد کی اموات کی اطلاعات ہیں۔
طبی حکام کے مطابق اسرائیل کے میزائل حملوں میں رواں ماہ کے دوران سیکڑوں افراد زخمی بھی ہوئے ہیں۔
