نیویارک: (دنیا نیوز) مین ہٹن میں امیگریشن حکام کے چھاپوں کے خلاف عوام نے بھرپور مظاہرہ کیا جس میں کئی افراد کو گرفتار کر لیا گیا۔
سڑکوں پر مظاہرین کی پولیس کے ساتھ جھڑپیں جاری ہیں، تارکین وطن کے ساتھ مقامی کمیونٹی کے لوگ بھی مظاہرے میں شامل ہیں جو گرفتاریاں بند کرنے کا مطالبہ کر رہے ہیں۔
نیو یارک پولیس ڈیپارٹمنٹ کے مطابق یہ واقعہ ہفتے کے روز دوپہر سے کچھ قبل لوئر مین ہٹن کے علاقے سینٹر سٹریٹ اور ہاورڈ سٹریٹ کے قریب پیش آیا، اطلاع ملنے پر جب پولیس موقع پر پہنچی تو متعدد افراد مختلف مقامات پر سڑک اور نکلنے کے راستے بند کر رہے تھے۔
پولیس کا مزید کہنا تھا کہ کچھ مظاہرین کو ملبہ پھینکتے ہوئے بھی دیکھا گیا، بارہا منتشر ہونے کے احکامات کے باوجود لوگ وہاں سے نہ ہٹے، بعدازاں پولیس نے متعدد افراد کو حکم نہ ماننے پر گرفتار کر لیا۔
