کیلیفورنیا: (دنیا نیوز) امریکا کی ریاست کیلیفورنیا کے ایک مال میں فائرنگ کا واقعہ پیش آیا جس میں 3 افراد زخمی ہوگئے۔
خبر ایجنسی کے مطابق سیلیکون ویلی کے معروف ویسٹ فیلڈ ویلی فیئر مال میں بلیک فرائیڈے کی خریداری کے دوران فائرنگ کے واقعے نے خریداروں میں بھگدڑ مچا دی، زخمیوں ایک مرد، ایک خاتون اور ایک 16 سالہ لڑکی شامل ہے جنہیں سپتال منتقل کر دیا گیا۔
پولیس کے ترجمان سارجنٹ جارجے گیریبے نے جائے وقوعہ پر میڈیا کو بتایا کہ یہ واقعہ عام خریداروں کو نشانہ بنانے کیلئے نہیں کیا گیا تھا، واقعہ دو افراد کے درمیان کسی تنازع کے نتیجے میں پیش آیا، جس کے باعث فائرنگ ہوئی، زخمی ہونے والی دونوں خواتین راہ گزر تھیں اور اس جھگڑے سے ان کا کوئی تعلق نہیں تھا۔
پولیس ترجمان کا مزید کہنا تھا کہ فائرنگ کرنے والا ملزم پولیس کے پہنچنے سے قبل ہی موقع سے فرار ہو گیا اور جائے وقوعہ سے کوئی اسلحہ برآمد نہیں ہوسکا، ابتدائی تحقیقات سے معلوم ہوا ہے کہ فائرنگ سے قبل ملزم کا زخمی ہونے والے مرد سے تکرار ہوئی، جس کے بعد اس نے پستول نکال کر گولیاں چلا دیں۔
