مقبوضہ بیت المقدس: (دنیا نیوز) اسرائیلی کی فوج اور سکیورٹی ایجنسی شین بیت نے دعویٰ کیا ہے کہ غزہ میں حملہ کر کے حماس کے سینئر رہنما رائید سعد کو شہید کر دیا گیا۔
وہ حماس کے عسکری ونگ القسام بریگیڈ میں ہتھیاروں کے شعبے کے سربراہ تھے، سعد کا شمار القسام بریگیڈ کے سینئر ترین رہنماؤں میں ہوتا ہے جنہوں نے سات اکتوبر 2023 کے حملے کی قیادت کی تھی۔
حماس کے شہری دفاع کے ترجمان محمود باسل نے بتایا کہ اسرائیل نے غزہ شہر میں ایک گاڑی کو نشانہ بنایا جس میں رائید سعد شہید ہوئے اور دیگر چار افراد زخمی ہوئے، حملے کے سبب گاڑی کے قریب سے گزرنے والے کئی اور افراد بھی زخمی ہوئے ہیں۔
غزہ میں حماس کے مقامی رہنما نے بتایا ہے کہ اس حملے میں رائید سعد کے علاوہ حماس کے ایک اور رہنما بھی شہید ہوئے ہیں، سعد کے بارے میں خیال کیا جاتا ہے کہ وہ اکتوبر میں جنگ بندی کے بعد سے تشکیل پانے والے فوجی کونسل میں شامل ہیں۔
اس سے پہلے بھی اسرائیل نے متعدد مرتبہ انہیں قتل کرنے کی کوشش کی، وہ طویل عرصے سے اسرائیل کو سب سے زیادہ مطلوب حماس کے رہنماوں میں ایک تھے، جنہیں اسرائیل دو دہائیوں سے مارنے کو کوشش کر رہا تھا۔
