مسسی سیپی:(دنیا نیوز) امریکی ریاست مسسی سیپی میں ایک مسلح شخص نے مختلف مقامات پر فائرنگ کرکے 6 افراد کو ہلاک کردیا ہے۔
پولیس کے مطابق فائرنگ کے واقعات ایک ہی رات میں 3 مختلف مقامات پر پیش آئے، یہ واقعات مسسی سیپی کے شہر ویسٹ پوائنٹ میں پیش آئے جو الاباما کی سرحد کے قریب واقع ہے۔
حکام کا کہنا تھا کہ ہلاک ہونے والوں میں بعض افراد کا مبینہ طور پر حملہ آور سے خاندانی تعلق بھی تھا جب کہ کاؤنٹی شیرف نے بتایا کہ یہ واقعہ کمیونٹی کے لیے ایک بڑا سانحہ ہے تاہم ملزم کو حراست میں لے لیا گیا ہے اور اب عوام کو مزید کسی خطرے کا سامنا نہیں ہے، واقعے میں ہلاک ہونے والوں کی شناخت تاحال ظاہر نہیں کی گئی۔
پولیس نے بتایا کہ فائرنگ کے محرکات اور دیگر پہلوؤں کی تحقیقات جاری ہیں جبکہ متاثرہ خاندانوں سے ہمدردی کا اظہار کیا گیا ہے۔
دوسری جانب حکام کا مزید کہنا تھا کہ تحقیقات مکمل ہونے پر مزید تفصیلات جاری کی جائیں گی۔
