غیر ملکی میڈیا کے مطابق ایران کی اوپن مارکیٹ میں ڈالر کی قیمت ملکی تاریخ کی بلند ترین سطح پر پہنچ گئی اور ڈالر کے مقابلے میں ایرانی تومان کی قدر ملکی تاریخ کی کم ترین سطح پر ہے۔

رپورٹ کے مطابق ایک امریکی ڈالر 2 لاکھ تومان سے بھی مہنگا ہو گیا ہے، مہنگائی میں مسلسل اضافے نے عام گھرانوں پر معاشی دباؤ مزید بڑھا دیا ہے اور ایران میں سالانہ مہنگائی کی شرح بڑھ کر 61.4 فیصد ہو گئی ہے۔

اشیائے خورونوش کی قیمتوں میں گزشتہ سال کے مقابلے میں 128.1 فیصد اضافہ ہوا ہے، ایرانی صدر مسعود پزشکیان نے تسلیم کیا کہ ایرانی شہری اس وقت بہت سے مسائل کا سامنا کر رہے ہیں۔

حکام کا کہنا ہے کہ ہم پورے دل و جان سے مہنگائی، روزگار اور معاش سے متعلق مشکلات پر قابو پانے اور عوام کے مستقبل کو محفوظ بنانے کی کوشش کر رہے ہیں، تاکہ وہ عزت اور وقار کے ساتھ زندگی گزار سکیں۔